L-ITTRA LIR-RUMANI

Dwar Din l-Ittra

L-enfasi speċjali ta’ din l-Ittra hija biex Pawlu jintroduċi lilu nnifsu u l-messaġġ tiegħu lill-Knisja f’Ruma. Pawlu jgħidilhom li hu appostlu, magħżul biex jippriedka l-aħbar it-tajba (1:1). U l-messaġġ li hu jħabbar “hu qawwa ta’ Alla għas-salvazzjoni ta’ dawk kollha li jemmnu, l-ewwel il-Lhud u mbagħad il-Griegi”
Din l-Ittra kienet miktuba fix-xitwa tas-sena 57-58 W.K. Pawlu kien f’Korintu, fit-tmiem tat-Tielet Vjaġġ tal-ministeru tiegħu.
Pawlu jfakkar lill-qarrejja tiegħu, “²³Il-bnedmin kollha dinbu u ċċaħdu mill-glorja ta’ Alla” (3:23). Imma kif aħna nistgħu nkunu magħmula aċċettabbli għal Alla? Din hija l-mistoqsija li huwa jwieġeb f’din l-ittra. Pawlu jibda billi juri kif kulħadd naqas milli jagħmel dak li Alla jeħtieġ. Il-Lhud ma kinux obdew il-Liġi ta’ Mosè, u l-Ġentili kienu rrifjutaw saħansitra li jaħsbu dwar Alla, għalkemm Alla kien kellimhom f’ħafna modi differenti (1:18—3:20).
“²¹Imma issa l-ġustizzja ta’ Alla dehret mingħajr il-liġi, għad li l-liġi u l-profeti jixhdu għaliha. ²²U din hi l-ġustizzja ta’ Alla u li Alla jagħti permezz tal-fidi f’Ġesù Kristu lil dawk li jemmnu bla ma jagħżel bejniethom. ²³Il-bnedmin kollha dinbu u ċċaħdu mill-glorja ta’ Alla, ²⁴Għalhekk issa huma jkunu iġ-ġustifikati bil-grazzja tiegħu li jagħtihom minn rajh permezz tal-fidwa li hemm fi Kristu Ġesù” (Rumani 3:21-24).
“²⁵Li kien mogħti għal dnubietna, u mqajjem għall-ġustifikazzjoni tagħna” (Rumani 4:25).

Ħarsa Ħafifa Lejn Din l-Ittra

• Pawlu u l-Messaġġ Tiegħu tal-Evanġelju (1:1-17)
• Kulħadd Huwa Ħati (1:18—3:20))
• Il-Mod ta’ Alla li Jaċċetta n-Nies (3:21—4:25)
• Ħajja Ġdida għan-Nies ta’ Alla (5:1—8:39)
• Xi Ngħidu Dwar in-Nies ta’ Iżrael? (9:1—11:36)
• Kif Tgħix il-Ħajja l-Ġdida tal-Imħabba? (12:1—15:13)
• Il-Pjanijiet u t-Tislijiet Personali ta’ Pawlu (15:14—16:27)

Rumani 1

Pawlu, qaddej ta’ Ġesù Kristu, imsejjaħ biex ikun appostlu, isseparat għall-evanġelju ta’ Alla.
Li hu kien wiegħed minn qabel bil-profeti tiegħu fl-iskrittura mqaddsa,
Fuq Ibnu, li ġej min-nisel ta’ David skont il-ġisem;
U li skont l-Ispirtu tal-qdusija, kien iddikjarat Bin Alla bis-setgħa bil-qawmien mill-imwiet:
Li bih aħna ħadna l-grazzja u l-appostolat, għall-ubbi-djenza tal-fidi fost il-ġnus kollha, għal ismu:
Li fosthom hemm intom ukoll l-imsejħin ta’ Ġesù Kristu:
Li dawk kollha li huma Ruma, il-maħbubin ta’ Alla, im-sejħin biex ikunu qaddisin: grazzja lilkom u sliem minn għand Alla Missierna, u l-Mulej Ġesù Kristu.
L-ewwelnett, niżżiħajr lil Alla tiegħi permezz ta’ Ġesù Kristu għalikom ilkoll, għax il-fidi tagħkom hi magħrufa mad-dinja kollha.
Għax Alla, li jien naqdih bl-ispirtu tiegħi fl-evanġelju ta’ Ibnu, hu xhud tiegħi, li bla heda nsemmikom dejjem fit-talb tiegħi;
Billi nitlob, li b’xi mod jew b’ieħor, xi darba issa jkolli, jekk Alla jrid, vjaġġ tajjeb biex nasal sa għandkom.
Għax nixtieq ħafna li narakom, biex nagħtikom xi don spiritwali, biex tkunu mwettqin.
Jew aħjar, biex nitfarraġ flimkien magħkom fil-fidi li għandna, intom u jien.
Issa jien ma rridx li ma tkunux tafu, ħuti, li bosta drabi għamilt il-ħsieb li nasal sa għandkom, (imma s’issa kont imfixkel,) biex ikolli xi frott fostkom ukoll, bħalma fost il-Ġentili l-oħra.
Jien obligat sew lejn il-Griegi, u kemm lejn il-Barbari; sew lejn il-għorrief, u kemm lejn dawk li mhumiex għorrief.
Għalhekk, daqs kemm jiġi minni, jien lest li nxandar l-evanġelju lilkom li qegħdin Ruma wkoll.
Jiena ma nistħix mill-Evanġelju; għax l-Evanġelju hu qawwa ta’ Alla għas-salvazzjoni ta’ dawk kollha li jemmnu, l-ewwel il-Lhud u mbagħad il-Griegi.
U fih tidher il-ġustizzja ta’ Alla minn fidi għal fidi, skont ma hemm miktub: Il-ġust jgħix bil-fidi.
Għax l-għadab t’Alla hu rrivelat mis-sema kontra kull ħażen u nġustizzja tal-bnedmin, li jżommu l-verità fl-inġustizz-ja;
Għax dak li jista’ jkun magħruf f’Alla jidher fihom; għax Alla wriehulhom.
Għax il-ħwejjeġ li ma jidhrux tiegħu, is-setgħa eterna tiegħu, u d-divinità, billi kienu sa mill-bidu tal-ħolqien tad-dinja magħrufin mill-ħwejjeġ li saru, jidhru ċari, għalhekk m’għandhomx skuża:
Għaliex meta għarfu lil Alla, ma gglorifikawhx bħal Alla, u lanqas ma raddew ħajr; iżda saru fiergħa fi ħsibijiethom, u qalbhom bla dehen iddallmet.
Fil-waqt li riduha ta’ għorrief, saru boloh.
U bidlu l-glorja ta’ Alla li ma jitħassarx fi xbieha magħmula bħal bniedem li jitħassar, u ta’ tjur, u ta’ bhejjem b’erba’ saqajn, u ta’ bhejjem li jitkaxkru.
Għalhekk Alla telaqhom għax-xewqat ħżiena tal-istess qalbhom, biex jagħmlu għajb lil ġisimhom bejniethom:
Huma li bidlu l-verità ta’ Alla f’gidba, u qiemu u qdew il-ħlieqa iżjed mill-Ħallieq, li hu mbierek għal dejjem. Amen.
Għalhekk Alla telaqhom għal ġibdiet bla ġieħ. In-nisa tagħhom bidlu l-użu naturali fl-użu kontra n-natura:
Hekk ukoll l-irġiel ħallew l-użu naturali tal-mara u xegħlu bil-passjoni għal xulxin, irġiel ma’ rġiel, biex jagħmlu ħwejjeġ bla ġieħ; u bi ħlas ta’ dan jirċievu fihom infushom il-ħlas li ħaqqhom ħtijiethom.
U bħalma wkoll ma għoġobhomx li jżommu lil Alla fil-għerf tagħhom, hekk telaqhom Alla għall-fehmiet imgħawġa, biex jagħmlu dawk il-ħwejjeġ li ma jixirqux:
Mimlijin b’kull xorta ta’ inġustizzja, fornikazzjoni, dnewwa, rgħiba, malizzja; mimlijin għira, qtil, ġlied, qerq, ħżunija; seksieka,
Jagħtu l-malafami, jobogħdu lil Alla, igħajru, kburin, fa-ħħarin, jivvintaw il-ħsara, diżubbidjenti għall-ġenituri tagħhom,
Bla moħħ, ma jżommux kelmithom, bla ġibda naturali, bla ħniena:
Li jafu l-ġudizzju ta’ Alla, li dawk li jagħmlu dawn il-ħwejjeġ ħaqqhom il-mewt, mhux biss jagħmluhom, iżda jieħdu pjaċir b’dawk li jagħmluhom.

Rumani 2

Għalhekk, ja bniedem, int min int, m’għandikx skuża li tagħmel ġudizzju: għax int u tagħmel ġudizzju minn ħaddieħor, tikkundanna lilek innifsek; għax int li tagħmel il-ġudizzju tagħmel l-istess ħwejjeġ.
Imma aħna żguri li l-ġudizzju ta’ Alla hu skont il-verità kontra dawk li jagħmlu ħwejjeġ bħal dawn.
U taħseb dan, ja bniedem, li tagħmel ġudizzju minn dawk li jagħmlu ħwejjeġ bħal dawn, u tagħmel l-istess, li taħrab mill-ġudizzju ta’ Alla?
Jew tmaqdar il-għana tat-tjieba tiegħu, u tas-sabar tiegħu, u tad-dewmien għall-għadab; u ma tafx li t-tjieba ta’ Alla tmexxik għall-indiema?
Imma bl-ebusija ta’ rasek u qalbek bla ndiema int taħżen fik innifsek il-għadab għall-jum il-għadab, meta jidher il-ġudizzju ġust ta’ Alla;
Li jrodd lil kull bniedem skont l-opri tiegħu.
Lil dawk li bis-sabar ikomplu fl-għemil it-tajjeb ifittxu glorja, u ġieh, u immortalità, il-ħajja ta’ dejjem.
Iżda lil dawk li jmieru u ma jobdux il-verità, iżda jobdu l-ħażen, qilla u għadab.
Tbatija u dwejjaq fuq kull ruħ ta’ bniedem li jagħmel il-ħażen, l-ewwel għal-Lhudi, u mbagħad għall-Grieg;
Glorja u ġieh u sliem għal kull min jagħmel it-tajjeb, l-ewwel għal-Lhudi, u mbagħad għall-Grieg.
Għax Alla ma jħares lejn wiċċ ħadd!
Għax dawk kollha li dinbu mingħajr il-liġi jintilfu wkoll mingħajr il-liġi: u dawk kollha li dinbu fil-liġi jsir ġudizzju minnhom bil-liġi;
Għax mhux dawk li jisimgħu l-liġi huma ġusti quddiem Alla, iżda dawk li jħarsu l-liġi jkunu ġġustifikati.
Għax meta l-Ġentili, li m’għandhomx il-liġi, jagħmlu min-natura l-ħwejjeġ li huma fil-liġi, dawn, li m’għandhomx il-liġi, huma liġi għalihom infushom:
Huma juru x-xogħol tal-liġi miktub f’qalbhom, billi tixhdu wkoll il-kuxjenza tagħhom, u l-ħsibijiet tagħhom li issa jakkużaw u issa jiskużaw wieħed lil ieħor;
Fil-jum meta Alla jagħmel ġudizzju mill-ħwejjeġ sigrieti tal-bnedmin skont l-evanġelju tiegħi permezz ta’ Ġesù Kristu.
Ara, int tissejjaħ Lhudi, u tistrieħ fuq il-liġi, u tiftaħar b’Alla.
U taf ir-rieda tiegħu, u tapprova l-ħwejjeġ eċċellenti mgħallem mil-liġi;
U pperswadejt lilek innifsek li int gwida tal-għomja, dawl ta’ dawk li huma fid-dlam.
Imgħallem ta’ min hu bla għaqal, għalliem tat-tfal, u li għandek il-forma tal-għerf u tas-sewwa fil-liġi.
U int mela li tgħallem lil ħaddieħor, ma tgħallimx lilek innifsek? Int li tippriedka li bniedem m’għandux jisraq, tisraq int?
Int li tgħid li bniedem m’għandux jagħmel adulterju, tagħmel adulterju int? Int li tiskerrah l-idoli, tisraq it-tempji?
Int li tiftaħar bil-liġi, tiddiżunara ’l Alla billi tikser il-liġi?
Għax l-isem ta’ Alla hu mżeblaħ fost il-Ġentili minħabba fikom, kif inhu miktub.
Għax iċ-ċirkonċiżjoni tassew tiswa, jekk int tħares il-liġi; iżda jekk int tikser il-liġi, iċ-ċirkonċiżjoni tiegħek issir bla ċirkonċiżjoni.
Jekk mela wieħed li m’għandux ċirkonċiżjoni jħares il-preċetti tal-liġi, in-nuqqas taċ-ċirkonċiżjoni tiegħu ma jingħadlux bħala ċirkonċiżjoni.
U jekk dak li hu bla ċirkonċiżjoni min-natura, iħares il-liġi, ma jagħmilx ġudizzju minnek, int, li bl-ittra u ċ-ċirkonċiżjoni, tikser il-liġi?
Għax mhux min jidher minn barra, hu Lhudi; lanqas m’hi ċirkonċiżjoni, dik li tidher minn barra fil-ġisem:
Iżda hu Lhudi, dak li hu wieħed minn ġewwa; u ċ-ċirkonċiżjoni hi dik tal-qalb, fl-ispirtu, u mhux fl-ittra; u t-tifħir tiegħu mhux tal-bnedmin, imma ta’ Alla.

Rumani 3

X’vantaġġ mela għandu l-Lhudi? Jew x’fejda hemm fiċ-ċirkonċiżjoni?
Ħafna b’kull mod: l-ewwelnett, għax lilhom kienu fdati l-orakli t’Alla.
X’inhu mela jekk x’uħud ma emmnux? In-nuqqas tal-fidi tagħhom jagħmel bla effett il-fedeltà ta’ Alla?
Ma jkun qatt! Ħa jkun jaf kulħadd li Alla hu veru u kull bniedem giddieb. Hekk hemm miktub: “Biex tkun iġġusti-fikat fi kliemek, u tirbaħ meta tkun iġġudikat.
Imma jekk il-ħażen tagħna jirrikmanda l-ġudizzju ta’ Alla, xi ngħidu? Hu bla ġudizzju Alla li jitħallas? Nitkellem bħala bniedem.
Ma jkun qatt! Għax inkella kif jista’ Alla jagħmel ġudizzju mid-dinja?
Għax jekk is-sewwa ta’ Alla permezz tal-gidba tiegħi aktar kotor għall-glorja tiegħu; għaliex għandu jsir ġudizzju minni wkoll bħala midneb?
U mhux kif x’uħud igħajruna, u x’uħud igħidu li aħna ngħidu: Ħa nagħmlu d-deni, biex jiġi t-tajjeb? Il-kundanna ta’ dawn hi ġusta.
Xi ngħidu mela? Aħna aħjar minnhom? B’ebda mod. Ġa wrejna li sew il-Lhud u sew il-Griegi huma lkoll taħt id-dnub.
Kif inhu miktub: M’hemm ħadd ġust, le, lanqas wieħed:
M’hemm ħadd li jifhem; m’hemm ħadd li jfittex ’l Alla.
Ilkoll ħarġu mit-triq, kollha kemm huma ma jiswewx; ħadd m’hemm li jagħmel is-sewwa, le, lanqas wieħed.
Gerżumithom qabar miftuħ; b’ilsienhom iqarrqu; velenu tas-sriep taħt xofftejhom:
Saħtiet u mrar fommhom mimli:
Ħfief riġlejhom biex ixerdu d-demm:
Ħerba u miżerja hemm fi triqathom:
U t-triq tas-sliem ma għarfuhiex:
Mhemmx biża’ ta’ Alla quddiem għajnejhom.
Issa aħna nafu li kull ħaġa li tgħid il-liġi, tgħidha lil dawk li huma taħt il-liġi:
Għalhekk ħadd ma jkun iġġustifikat quddiemu bl-opri tal-liġi: għax bil-liġi jingħaraf id-dnub.
Imma issa l-ġustizzja ta’ Alla dehret mingħajr il-liġi, għad li l-liġi u l-profeti jixhdu għaliha.
U din hi l-ġustizzja ta’ Alla u li Alla jagħti permezz tal-fidi f’Ġesù Kristu lil dawk li jemmnu bla ma jagħżel bejniethom.
Għax kollha dinbu u ċċaħdu mill-glorja ta’ Alla,
U huma ġġustifikati bil-grazzja tiegħu bħala rigal li jagħtihom permezz tal-fidwa li hija fi Kristu Ġesù.
Lilu Alla qiegħdu bħala espjazzjoni b’demmu permezz tal-fidi. Dan kien biex juri l-ġustizza tiegħu waqt li qabel għalaq għajnejh għad-dnubiet ta’ qabel;
Biex juri, ngħid jien, il-ġustizzja tiegħu: fiż-żmien ta’ issa: biex ikun ġust, u jagħmel ġust lil min jemmen f’Ġesù.
Fejn hu mela l-ftaħir? Ma jidħolx. B’liema liġi? Tal-opri? Le: imma bil-liġi tal-fidi.
Għax aħna nżommu li bniedem hu iġġustifikat bil-fidi mingħajr l-opri tal-liġi.
Forsi Alla hu Alla tal-Lhud biss? Mhux tal-pagani wkoll? Iva, tal-pagani wkoll
Billi Alla hu wieħed, li jiġġustifika ċ-ċirkonċiżi bil-fidi u dawk li mhumiex ċirkonċiżi permezz tal-fidi.
Qegħdin aħna mela nxejnu l-liġi permezz tal-fidi? Ma jkun qatt! Iva, qegħdin nistabbilixxu l-liġi.

Rumani 4

Xi ngħidu mela li sab Abraham l-antenat tagħna skont il-ġisem?
Għax jekk Abraham kien iġġustifikat bl-opri, għandu biex jiftaħar; iżda mhux quddiem Alla.
Għax xi tgħid l-iskrittura? Abraham emmen f’Alla, u dan ingħaddlu bħala ġustizzja.
Issa, lil dak li jaħdem, il-ħlas ma jingħaddlux bħala grazzja, imma bħala dejn.
Imma għal dak li ma jaħdimx, iżda jemmen f’dak li jiġġustifika l-ħażin, il-fidi tiegħu tingħadd bħala ġustizzja.
Bħalma wkoll igħid David li mbierek hu l-bniedem, li Alla jgħoddlu l-ġustizzja mingħajr opri.
Billi jgħid: Imberkin dawk li ħtijiethom maħfura, u li dnubiethom mgħottija.
Imbierek ir-raġel li l-Mulej ma jgħoddlux dnub.
Dil-barka tiġi mela biss fuq dawk li huma ċirkonċiżi, jew fuq dawk ukoll li mhumiex ċirkonċiżi? għax aħna ngħidu li ’l Abraham il-fidi kienet magħduda bħala ġustizzja.
Kif kienet mela magħduda? Meta kien ċirkonċiż, jew meta ma kienx ċirkonċiż? Mhux meta kien ċirkonċiż, iżda qabel ma kien ċirkonċiż.
U ħa s-sinjal taċ-ċirkonċiżjoni siġill tal-ġustizzja tal-fidili kellu qabel ma kien ċirkonċiż; biex isir il-missier ta’ dawk kollha li jemmnu, għalkemm ma jkunux ċirkonċiżi; biex il-ġustizzja tingħaddilhom ukoll:
U l-missier taċ-ċirkonċiżjoni għal dawk li mhux biss huma taċ-ċirkonċiżjoni, iżda wkoll li jimxu fil-passi ta’ dik il-fidi t’Abraham missierna, li kellu qabel ma kien ċirkonċiż.
Għax il-wegħda, li hu jkun il-werriet tad-dinja, ma kinetx lil Abraham, jew lin-nisel tiegħu, permezz tal-liġi, iżda permezz tal-ġustizzja tal-fidi.
Għax jekk dawk li huma tal-liġi huma werrieta, il-fidi titbattal, u l-wegħda ma tiswiex:
Għax il-liġi tnissel il-għadab: u fejn m’hemmx liġi, m’hemmx ksur ta’ liġi.
Għalhekk hu bil-fidi, biex ikun bi grazzja; biex il-wegħda tkun żgura għan-nisel kollu; mhux għal dak biss li hu tal-liġi, iżda għal dak ukoll li hu tal-fidi ta’ Abraham; li hu missierna lkoll.
Skont kif inhu miktub: Missier ta’ ħafna ġnus għamiltek jien, quddiem dak li emmen fih, Alla li jagħti l-ħajja lill-mejtin, u jsejjaħ lil dawk il-ħwejjeġ li mhumiex bħallikieku huma.
Li meta ma kienx hemm tama, emmen fit-tama, biex isir il-missier ta’ ħafna ġnus, skont ma ntqal: Hekk ikun nislek.
U billi ma kienx dgħajjef fil-fidi, ma ħasibx li ġismu kien diġa’ mejjet, meta kellu mitt sena, u lanqas li mejjet kien il-ġuf ta’ Sara:
Ma qatax qalbu quddiem il-wegħda ta’ Alla minħabba n-nuqqas ta’ fidi; iżda kien qawwi fil-fidi, billi ta glorja lil Alla;
Konvint għalkollox li dak li wiegħed kien jista’ wkoll jagħmlu.
U għalhekk dan kien lilu magħdud b’ġustizzja.
Issa mhux għalih waħdu nkiteb, li kien magħdud lilu;
Iżda għalina wkoll, li jkun magħdud lilna, jekk nemmnu f’dak li qajjem lil Ġesù Mulej tagħna mill-mewt;
Li kien mogħti għal dnubietna, u mqajjem għall-ġustifikazzjoni tagħna.

Rumani 5

Għalhekk, billi konna iġġustifikati bil-fidi, għandna s-sliem ma’ Alla permezz tal-Mulej tagħna Ġesù Kristu;
Li bih ukoll għandna dħul bil-fidi f’din il-grazzja li fiha qegħdin, u nifirħu fit-tama tal-glorja ta’ Alla.
U mhux hekk biss, imma niftaħru wkoll bit-tribulazz-jonijiet: billi nafu lit-tribulazzjoni tnissel is-sabar;
U s-sabar, il-prova, u l-prova, it-tama:
U t-tama ma ġġegħilniex nistħu; għax l-imħabba ta’ Alla hi msawba fi qlubna bl-Ispirtu Qaddis li hu mogħti lilna.
Għax meta konna għadna bla saħħa, Kristu fi żmien appuntat miet għall-ħżiena.
Għax bilkemm għal raġel sewwa wieħed ikun irid imut: iżda għal raġel tajjeb jista’ jkun li wieħed ukoll ikollu l-ħila jmut.
Iżda Alla jirrikmanda l-imħabba tiegħu lilna, billi meta konna għadna midinbin, Kristu miet għalina.
Aktar u aktar mela, billi aħna iġġustifikati b’demmu, inkunu salvati mill-għadab permezz tiegħu.
Għax jekk, meta konna għedewwa, konna rikonċiljati ma’ Alla bil-mewt ta’ Ibnu, aktar u aktar, billi aħna rrikonċiljati, inkunu salvati bil-ħajja tiegħu;
Mhux hekk biss, imma nifirħu wkoll f’Alla permezz ta’ Ġesù Kristu l-Mulej tagħna, li bih aħna issa rċevejna r-rikonċiljazzjoni.
Għalhekk, bħalma bi bniedem wieħed id-dnub daħal fid-dinja, u l-mewt bid-dnub; u hekk il-mewt għaddiet għal fuq kull bniedem, għax kollha dinbu.
Għax sal-liġi kien id-dnub fid-dinja: iżda d-dnub mhux magħdud meta ma hemmx liġi.
Madankollu l-mewt ħakmet minn Adam sa Mosè, ukoll fuq dawk li ma dinbux bi dnub bħad-dnub ta’ Adam, li hu x-xbieha ta’ dak li kellu jiġi.
Iżda mhux bħall-ħtija, hi hekk ukoll il-għotja b’xejn. Għax jekk permezz tal-ħtija ta’ wieħed ħafna mietu, aktar u aktar il-grazzja ta’ Alla, u l-għotja bil-grazzja, mogħtija per-mezz ta’ bniedem wieħed, Ġesù Kristu, xterdu fuq il-ħafna.
U mhux bħal ma kien mill-wieħed li dineb, kien hekk mill-għotja: għax il-ġudizzju ta’ wieħed ġieb il-kundanna, iżda l-għotja li ġiet minn ħafna ħtijiet ġiebet il-ġustifikazzjoni.
Għax jekk għall-ħtija ta’ wieħed il-mewt ħakmet permezz ta’ dak il-wieħed: aktar u aktar dawk li jieħdu l-kotra tal-grazzja u tal-glorja tal-ġustizzja jsaltnu fil-ħajja b’wieħed, Ġesù Kristu.
Għalhekk bħalma bil-ħtija ta’ wieħed waqgħet il-kun-danna fuq il-bnedmin kollha, hekk ukoll bil-ġudizzju ta’ wieħed waħdu l-għotja ġiet fuq il-bnedmin kollha għall-ġustifikazzjoni tal-ħajja.
Għax bħalma bin-nuqqas tal-ubbidjenza ta’ bniedem wieħed ħafna saru midinbin, hekk bl-ubbidjenza ta’ wieħed il-ħafna jsiru ġusti.
Iżda l-liġi ndaħlet biex toktor il-ħtija. Imma fejn id-dnub kotor, il-grazzja kotrot wisq aktar:
Biex bħalma d-dnub saltan fil-mewt, hekk ukoll il-grazzja ssaltan permezz tal-ġustizzja, għall-ħajja ta’ dejjem b’Ġesù Kristu l-Mulej tagħna.

Rumani 6

Xi ngħidu mela? Nibqgħu fid-dnub, biex toktor il-grazzja?
Ma jkun qatt! Kif nistgħu aħna, li mitna għad-dnub, nibqgħu ngħixu fih iżjed?
Ma tafux, li ħafna minna li konna mgħammdin f’Ġesù Kristu, konna mgħammdin fil-mewt tiegħu?
Għalhekk aħna midfunin miegħu bil-magħmudija fil-mewt; biex bħalma Kristu qam mill-imwiet bil-glorja tal-Missier, hekk ukoll aħna nimxu fit-tiġdid tal-ħajja.
Għax jekk sirna ħaġa waħda miegħu fix-xebħ tal-mewt tiegħu, hekk ukoll inkunu fix-xebħ tal-qawmien tiegħu.
Billi tafu dan: Li l-bniedem qadim tagħna kien mislub miegħu, biex il-ġisem tad-dnub jinqered, biex ma naqdux aktar lid-dnub;
Għax min miet hu meħlus mid-dnub.
Issa jekk aħna mejtin ma’ Kristu, nemmnu li għad ngħixu wkoll miegħu.
Billi nafu li Kristu wkoll wara li qam mill-imwiet ma jmut qatt iżjed; il-mewt ma ssaltanx iżjed fuqu.
Għax li miet, miet darba għal dejjem għad-dnub; imma li ħaj, ħaj għal Alla.
Hekk ukoll intom qisu wkoll ruħkom mejtin tassew għad-dnub, imma ħajjin għal Alla fi Kristu Ġesù l-Mulej tagħna.
Tħallux mela d-dnub isaltan f’ġisimkom li jmut, biex tobduh fix-xewqat ħżiena tiegħu.
Lanqas tagħtu l-membri ta’ ġisimkom biex ikunu għod-da tal-ħażen għad-dnub; iżda agħtu lilkom infuskom lil Alla, bħala ħajjin mill-imwiet, u l-membri ta’ ġisimkom bħala għod-da tal-ġustizzja għal Alla.
Għax id-dnub ma jsaltanx iżjed fuqkom: għax mintomx taħt il-liġi, iżda taħt il-grazzja.
X’inhu mela? Nidinbu, għax m’għadniex taħt il-liġi, imma taħt il-grazzja? Ma jkun qatt!
Ma tafux intom, li lil min tagħtu ruħkom bħala lsiera biex tobduh, issiru lsiera ta’ dak li tobdu; sewwa tad-dnub għall-miena tewt, u sewwa tal-ubbidjenza għall-ġustizzja?
Iżda niżżu ħajr lil Alla, għax kontu lsiera tad-dnub, imma minn qalbkom obdejtu lil dik il-għamla ta’ tagħlim li għaliha intom kontu mogħtijin.
Infdejtu minn taħt id-dnub, imma tjassartu għall-ġustizzja.
Nitkellem ta’ bniedem minħabba d-dgħufija ta’ ġisimkom: għax bħal ma tajtu l-membri ta’ ta’ ġisimkom biex ikunu l-lsiera tal-impurità u għal l-inġustizzja tal-ksur tal-liġi; hekk issa agħtu l-membri ta’ ġisimkom biex ikunu lsiera tal-ġustizzja għall-qdusija tagħkom.
Għax meta kontu lsiera tad-dnub, kontu ħielsa mill-ġudizzju.
Xi frott kellkom f’dak iż-żmien mill-ħwejjeġ li minn-hom issa tistħu? Għax it-tmiem ta’ dawk il-ħwejjeġ hi l-mewt.
Iżda issa billi intom meħlusin mid-dnub, u sirtu lsiera ta’ Alla, għandkom il-frott tagħkom għall-qdusija, u bħala tmiem il-ħajja ta’ dejjem.
Għax il-ħlas id-dnub hi l-mewt; iżda l-għotja ta’ Alla hi l-ħajja ta’ dejjem fi Kristu Ġesù l-Mulej tagħna.

Rumani 7

Ma tafux, ħuti, għax lil dawk li jafu l-liġi qiegħed inkellem, li l-liġi għandha ħakma fuq bniedem kemm idum ħaj?
Għax il-mara li għandha żewġha hi marbuta bil-liġi ma’ żewġha kemm idum ħaj; iżda jekk imut ir-raġel, hi maħlula mil-liġi ta’ żewġha.
Għalhekk mela, jekk waqt li għadu ħaj żewġha, tiżżew-weġ raġel ieħor, tissejjaħ adultera: iżda jekk imut żewġha, hi meħlusa minn dik il-liġi; u ma tkunx adultera, jekk tiżżewweġ raġel ieħor.
Hekk intom, ħuti, mittu għal-liġi permezz tal-ġisem ta’ Kristu, biex intom tkunu ta’ ħaddieħor, jiġifieri, ta’ dak li kien imqajjem mill-imwiet, sabiex nagħmlu l-frott għal Alla.
Għax meta konna fil-ġisem, il-ġibdiet għad-dnub, li kienu mil-liġi, kienu jaħdmu fil-membri ta’ ġisimna biex jagħtu frott lill-mewt.
Iżda issa aħna maħlulin mil-liġi, mejtin għal dak li fih konna miżmunin; biex naqdu fit-tiġdid tal-ispirtu, u mhux fil-qedem tal-kitba.
Xi ngħidu mela? Il-liġi dnub? Ma jiġri qatt dan! Le, jien m’għaraftx id-dnub, ħlief biss mil-liġi: għax ma kontx inkun naf x’inhi x-xenqa għall-ħwejjeġ ta’ ħaddieħor, kieku l-liġi ma qalitx: La tixxennaqx għall-ħwejjeġ ta’ ħaddieħor.
Iżda d-dnub, billi sab il-waqt bil-kmandament, nissel fija kull passjoni. Għax mingħajr il-liġi d-dnub hu mejjet.
U jien kont ħaj darba bla liġi: iżda meta ġie l-kmandament, id-dnub raġa’ ħa l-ħajja, u jien mitt.
U dan il-kmandament, li kellu jkun biex ikolli l-ħajja, tani l-mewt.
Għax id-dnub, billi sab il-waqt bil-kmandament, qarraq bija, u bih qatilni.
Għalhekk il-liġi hi qaddisa, u l-kmandament qaddis, u ġust, u tajjeb.
Mela dak li hu tajjeb sar mewt għalija? Ma jkun qatt! Imma d-dnub, biex jidher dnub, nissel il-mewt fija b’dak li hu tajjeb; biex id-dnub bil-kmandament isir iżjed dnub.
Għax aħna nafu li l-liġi hi spiritwali: iżda jien tal-laħam, mibjugħ ilsir taħt id-dnub.
Għax dak li nagħmel ma nifhmux: għax dak li rrid, ma nagħmlux; iżda dak li nobgħod, nagħmel.
Jekk mela nagħmel dak li ma rridx, naqbel mal-liġi li hi tajba.
Issa mela mhux aktar jien li nagħmel dan, imma d-dnub li jgħammar fija.
Għax jien naf li fija, jiġifieri, f’ġismi, ma tgħammar ebda ħaġa tajba: għax ir-rieda qiegħda fija; iżda kif nagħmel dak li hu tajjeb ma nafx.
Għax it-tajjeb li rrid jien ma nagħmilx: imma l-ħażin li ma rridx, dak nagħmel.
Issa jekk nagħmel dak li ma rridx, mhux iżjed jien li nagħmlu, imma d-dnub li jgħammar fija.
Insib mela liġi, li, meta rrid nagħmel it-tajjeb, il-ħażin jiġi quddiemi.
Għax nithenna fil-liġi t’Alla skont il-bniedem ta’ ġewwa:
Imma jien nara liġi oħra fil-membri ta’ ġismi, li tiġġieled kontra l-liġi ta’ moħħi, u tjassarni għal-liġi tad-dnub li hi fil-membri ta’ ġismi.
Ja miskin li jien! Min jeħlisni mill-ġisem ta’ dil-mewt?
Niżżi ħajr lil Alla permezz ta’ Ġesù Kristu l-Mulej tagħna. Hekk mela bil-moħħ jien naqdi l-liġi ta’ Alla; iżda bil-ġisem il-liġi tad-dnub.

Rumani 8

Mela issa mhemm ebda kundanna għal dawk li huma fi Kristu Ġesù.
Għax il-liġi tal-Ispirtu tal-ħajja fi Kristu Ġesù ħelsitni mil-liġi tad-dnub u l-mewt.
Għax dak li ma setgħitx tagħmel il-liġi, għax kienet dgħajfa minħabba l-ġisem, Alla billi bagħat l-Iben tiegħu nnifsu f’xebh ta’ ġisem tad-dnub, u għad-dnub, ikkundanna d-dnub fil-ġisem:
Biex dak li b’ġustizzja titlob il-liġi jseħħ fina, li ma nimxux skont il-ġisem, imma skont l-Ispirtu.
Dawk li jgħixu skont il-ġisem, ħsiebhom fil-ħwejjeġ tal-ġisem; dawk li jgħixu skont l-Ispirtu, ħsiebhom fil-ħwejjeġ tal-Ispirtu.
Għax il-moħħ tal-ġisem hu l-mewt; il-moħħ tal-Ispirtu hu l-ħajja u s-sliem.
Għaliex il-moħħ tal-ġisem hu għadu ta’ Alla; għax mhux suġġett għal-liġi ta’ Alla, u lanqas tassew ma jista’ jkun.
Għalhekk mela dawk li jgħixu skont il-ġisem ma jistgħux jogħġbu lil Alla.
Imma intom ma tgħixux fil-ġisem, iżda fl-Ispirtu, jekk l-Ispirtu ta’ Alla jgħix fikom. Issa jekk xi ħadd ma għandux fih l-Ispirtu ta’ Kristu, dan mhuwiex tiegħu.
U jekk Kristu hu fikom, il-ġisem hu mejjet minħabba d-dnub; iżda l-Ispirtu hu ħaj minħabba l-ġustizzja.
Imma jekk l-Ispirtu ta’ dak li qajjem lil Ġesù mill-imwiet igħammar fikom, dak li qajjem lil Kristu mill-imwiet jagħti wkoll il-ħajja lil ġisimkom li jmut bl-Ispirtu tiegħu li jgħammar fikom.
Għalhekk, ħuti, m’aħniex marbutin lejn il-ġisem, biex ngħixu skont il-ġisem.
Għax jekk tgħixu skont il-ġisem, tmutu: imma jekk bl-Ispirtu tmewtu għemil il-ġisem, tgħixu.
Għax dawk kollha li huma mmexxijin mill-Ispirtu ta’ Alla, huma wlied Alla.
Għax intom ma ħadtux spirtu ta’ jasar biex terġgħu tibżgħu; imma ħadtu Spirtu t’adozzjoni, li bih ngħajtu: Abba! Missier!
L-ispirtu nnifsu jixhed ma’ l-ispirtu tagħna, li aħna wlied Alla:
U jekk ulied, aħna werrieta; werrieta t’Alla, u werrieta ma’ Kristu; għax miegħu nbatu, biex inkunu wkoll igglorifikati flimkien.
Għax jien inqis li t-tbatijiet taż-żmien t’issa ma jixirqil-homx ikunu mxebbhin mal-glorja li għad tidher fina.
Għax il-ħlejjaq jistennew bil-ħrara l-manifestazzjoni ta’ wlied Alla.
Għax il-ħlejjaq kienu magħmulin suġġetti għall-frugħa, mhux għax iridu, iżda minħabba dak li issuġġettahom fit-tama;
Għaliex il-ħlejjaq ukoll jinħelsu mill-jasar tat-taħsir, u jaslu fil-ħelsien glorjuż ta’ wlied Alla.
Għax aħna nafu li l-ħolqien kollu jokrob u jħoss l-uġiegħ tal-ħlas sa dan il-waqt.
U mhux hu biss, imma aħna wkoll, li għandna l-ewwel frott tal-Ispirtu; aħna stess ukoll nokorbu ġewwa fina nfusna, waqt li nistennew l-adozzjoni, li hi l-fidwa ta’ ġisimna.
Għax fit-tama aħna konna salvati; iżda tama li tidher mhix tama; għax dak li wieħed jarah, għalfejn jittama fih?
Iżda jekk aħna nittamaw għal dak li ma narawx, nistennew bis-sabar għalih.
Hekk ukoll l-Ispirtu jgħin id-dgħufijiet tagħna: għax aħna ma nafux x’nitolbu kif jinħtieġ; iżda l-Ispirtu stess jitlob għalina bi tnehid li ma jistax jingħad.
U dak li jgħarbel il-qlub jaf x’inhi l-fehma tal-Ispirtu, għax jitlob għall-qaddisin skont ir-rieda ta’ Alla.
U aħna nafu li l-ħwejjeġ kollha jaħdmu flimkien għall-ġid ta’ dawk li jħobbu lil Alla; għal dawk li huma msejħin skont l-iskop tiegħu.
Għax dawk li għaraf minn qabel, ukoll ippredestinahom biex ikunu jaqblu max-xbieha ta’ Ibnu, biex ikun hu l-ewwel imwieled fost ħafna aħwa.
Barra minn hekk, lil dawk li ppredestinahom, lil dawn hu wkoll sejħilhom: u lil dawk li sejħilhom, lil dawn ukoll iġġustifikahom; u dawk li iġġustifikahom, lil dawn ukoll igglorifikahom.
Xi ngħidu għal dawn il-ħwejjeġ? Jekk Alla magħna min jista’ jkun kontra tagħna?
Hu li ma ħafirhiex lanqas lill-istess Ibnu, imma tah għalina lkoll, kif ma jagħtiniex ukoll miegħu b’xejn il-ħwejjeġ kollha?
Min se jakkużana l-magħżulin ta’ Alla? Alla stess hu dak li jiġġustifikahom.
Min se jikkundannhom? Kristu Ġesù miet, jew aħjar, qam mill-imwiet, jinsab fuq il-lemin ta’ Alla, hu li jidħol għalina.
Min jifridna mill-imħabba ta’ Kristu? Tribulazzjoni, jew dwejjaq, jew persekuzzjoni, jew ġuħ, jew għera, jew periklu, jew ix-xabla?
Bħalma hu miktub: Minħabba fik aħna l-jum kollu maqtulin; aħna miżmumin bħala ngħaġ għall-qatla.
Iżda f’dawn il-ħwejjeġ kollha, aħna aktar minn rebbieħa permezz ta’ dak li ħabbna.
Għax jien żgur, li la l-mewt, u lanqas il-ħajja; la l-anġli u lanqas it-tmexxija, la s-setgħat u lanqas il-ħwejjeġ t’issa, la l-ħwejjeġ li ġejjin,
U lanqas il-għoli, la l-fond, u lanqas l-ebda krea-tura oħra, ma tkun tista’ tifridna mill-imħabba ta’ Alla, li hi fi Kristu Ġesù l-Mulej tagħna.

Rumani 9

Ngħid is-sewwa, fi Kristu, miniex nigdeb, il-kuxjenza tiegħi wkoll tixhidli fl-Ispirtu Qaddis:
Li għandi swied il-qalb kbir u wġigħ kontinwu f’qalbi.
Għax nixtieq li nkun jien innifsi misħut minn Kristu għal ħuti, qraba tiegħi skont il-ġisem:
Li huma Iżraelin; u li tagħhom hi l-adozzjoni, u l-glorja, u r-rabtiet, u l-għoti tal-liġi, u s-servizz ta’ Alla, u l-wegħdi;
Li tagħhom huma l-patrijarki, li minnhom skont il-ġisem, ġie Kristu, li hu fuq kollox, Alla mbierek fiż-żminijiet. Amen.
Mhux bħallikieku l-kelma ta’ Alla sfat fix-xejn; għax mhux dawk kollha li tnisslu minn Iżrael, huma ta’ Iżrael.
Lanqas għaliex huma nisel ta’ Abraham huma kollha wlied; iżda, f’Iżakk jissejjaħ in-nisel tiegħek.
Jiġifieri, mhux ulied il-ġisem huma wlied Alla, imma l-imwielda bis-saħħa tal-wegħda huma meqjusa b’ulied Abraham
Għax din hi l-kelma tal-wegħda: Bħal daż-żmien niġi, u Sara jkollha tifel.
U mhux dan biss: imma wkoll meta Rebekka kienet saret omm minn wieħed, Iżakk missierna:
Għax billi t-tfal kienu għadhom ma twildux, la kienu għamlu tajjeb u lanqas ħażin, biex il-pjan ta’ Alla skont il-għażla jżomm sħiħ, mhux mill-opri, iżda minn dak li jsejjaħ;
Intqalilha: Il-kbir jaqdi liż-żgħir,
Kif inhu miktub: Ħabbejt lil Ġakobb, iżda bgħadt lil Għesaw.
Xi ngħidu mela? Hemm l-inġustizzja f’Alla? Ma jkun qatt!
Għax hu qal lil Mosè: Inħenn għal min inħenn, u nitħassar lil min nitħassar.
Għalhekk mela mhux billi wieħed irid, jew billi wieħed jiġri, iżda billi Alla juri ħniena.
Għax l-iskrittura tgħid lil Fagħrun: Għal dan stess jien qajjimtek, biex nuri fik il-qawwa tiegħi, u biex jixxandar ismi ma’ l-art kollha.
Għalhekk ikollu ħniena minn min irid ikollu ħniena, u jwebbes lil min irid.
Int mela tgħidli: Għaliex għandu mela jċanfar? Għax min waqaf lir-rieda tiegħu?
Iżda int min int, ja bniedem, biex teħodha kontra Alla? Il-ħaġa magħmula tista’ jaqaw tgħid lil min għamilha: Għaliex għamiltni hekk?
Jaqaw il-fuħħari m’għandux is-setgħa fuq it-tafal, biex jagħmel ħaġa ta’ ġieh, u ħaġa ta’ għajb, mill-istess għaġna?
X’inhu jekk Alla, biex juri l-korla tiegħu, u jgħarraf il-qawwa tiegħu, issapporta għal żmien twil ir-reċipjenti tal-korla imhejjijin għall-qerda.
U biex ikun jista’ jgħarraf il-għana tal-glorja tiegħu fuq reċipjenti tal-ħniena, li hu hejja minn qabel għall-glorja.
U magħna wkoll, li hu sejħilna, mhux biss mil-Lhud, imma wkoll mill-Ġentili?
Bħal ma jgħid ukoll f’Hosegħa: Insejħilhom poplu tiegħi, lil dawk li ma kinux poplu tiegħi; u maħbuba, lil dik li ma kenitx maħbuba.
U jiġri, li fejn kienu jgħidulhom: M’intomx poplu tiegħi; hemm jissejħu wlied Alla l-ħaj.
Isaija jgħajjat ukoll għal Iżrael: Għalkemm għadd ulied Iżrael ikun daqs ir-ramel tal-baħar, fdal ikun salvat:
Għax il-Mulej iżomm kelmtu fuq l-art, iżommha u jaqtagħha mingħajr dewmien.
U bħal ma qal Isaija minn Qabel: Kieku l-Mulej ta’ Sabaoth, ma ħallilniex nisel, bħal Sodoma, konna nsiru, u ’l Gomorra konna nixbhu.
Xi ngħidu mela? Li l-Ġentili, li ma kinux ifittxu l-ġus-tizzja, sabu l-ġustizzja; anzi l-ġustizzja li tiġi mill-fidi:
Iżda Iżrael, li kien jimxi mal-liġi tal-ġustizzja, ma wasalx sal-liġi.
Għaliex? Għax ma kinux ifittxuha bil-fidi, imma bl-opri tal-liġi. Għax tfixklu f’dik il-ġebla tat-tfixkil;
Kif inhu miktub: Ara, inqiegħed f’Sijon ġebla ta’ tfixkil u blata ta’ tiġrif: u kull min jemmen fih m’għandux imniex jistħi.

Rumani 10

Ħuti, nixtieq tassew minn qalbi nitlob quddiem Alla li huma jkunu salvati.
Jiena xhud għalihom li huma għandhom iż-żelu għal Alla, iżda dan iż-żelu mhux mibni fuq il-għerf veru.
Għax waqt li kienu njuranti dwar il-ġustizzja ta’ Alla, u billi fettxew biex jistabbilixxu l-ġustizzja tagħhom, huma ma qagħdux għall-ġustizzja ta’ Alla.
Għax Kristu hu tmiem il-liġi għall-ġudizzju ta’ kull min jemmen.
Għax Mosè kiteb fuq il-ġustizzja li ġejja mil-liġi: Li l-bniedem li jħares dawn il-ħwejjeġ igħix bihom.
Imma l-ġustizzja li tiġi mill-fidi tgħid hekk: La tgħidx f’qalbek: Min jitla’ fis-sema? jiġifieri, biex iniżżel lil Kristu minn fuq:
Jew: Min jinżel fil-qiegħ? jiġifieri, biex italla’ lil Kristu mill-imwiet.
Imma xi tgħid? Il-kelma qiegħda ħdejk, f’fommok stess, u f’qalbek: jiġifieri l-kelma tal-fidi, li aħna nxandru;
Għax jekk int tistqarr b’fommok li Ġesù hu Mulej, u temmen f’qalbek li Alla qajmu mill-imwiet, inti tkun salvat.
Wieħed jemmen f’qalbu biex ikollu l-ġustizzja u jistqarr b’xofftejh biex ikollu s-salvazzjoni.
Għax l-Iskrittura tgħid, ‘Kull min jemmen fih ma jintilifx’.
Ma hemmx distinzjoni bejn Lhudi u Grieg; Alla hu s-sid ta’ kulħadd u għani ma’ dawk kollha li jsejħulu.
Għax kull min isejjaħ isem il-Mulej isalva.
Imma kif jistgħu jsejħu lil dak li ma jemmnux fih? Kif jistgħu jemmnu f’dak li ma semgħux bih? Kif jistgħu jisimgħu jekk ma jxandrulhomx?
Kif jistgħu jxandrulhom jekk ma jkunux mibgħuta? Bħalma hemm miktub: Kemm huma sbieħ riġlejn dawk li jħabbru l-ġid.
Iżda mhux kulħadd qagħad għall-kelma tal-Evanġelju. Isaija ħabbar: Mulej, min emmen il-kelma li sama’ mingħan-dna?
Il-fidi, mela, tiġi mis-smigħ, u s-smigħ mix-xandir tal-kelma ta’ Kristu.
Iżda ngħid jien: Jaqaw ma semgħux? Iva, tabilħaqq, leħ-inhom instama’ ma’ l-art kollha, u kliemhom sa truf tad-dinja.
Iżda ngħid jien: Jaqaw Iżrael ma fehemx? L-ewwel Mosè qal: Inqanqal il-għira tagħkom b’dawk li mhumiex ġens, u b’ġens bla moħħ ngħaddabkom.
Iżda Isaija għandu l-ħila jgħid: Kont misjub minn dawk li ma kinux ifittxuni: dhert lil dawk li ma kinux jistaqsu għalija.
Iżda għal Iżrael igħid: Il-jum kollu ftaħt idejja għall-poplu li ma jobdix u rasu iebsa.

Rumani 11

Ngħid mela: Jaqaw rema Alla l-poplu tiegħu? Allaħa-res! Għax jien ukoll Iżraeli, minn nisel Abraham, minn tribù Benjamin.
Alla ma remiex lill-poplu tiegħu li kien jaf minn qabel. Jew ma tafux xi tgħid l-iskrittura fuq Elija? Kif talab ’l Alla kontra Iżrael?
Mulej qatlu l-profeti tiegħek, u ġarrfu l-artali tiegħek: u jien bqajt waħdi, u qegħdin ifittxu ħajti.
Imma x’qaltlu t-tweġiba ta’ Alla? Ħallejt għalija nnifsi sebat elef raġel, li ma lwewx irkupptejhom lejn Bagħal.
Hekk mela f’dan iż-żmien ukoll hemm fdal skont il-għażla tal-grazzja.
U, jekk inhu bil-grazzja, mhux aktar bl-opri; inkella l-grazzja mhix aktar grazzja.
Xi ngħidu, mela? Dak li kien ifittex Iżrael ma kisbux; iżda l-magħżulin kisbuh, u l-oħrajn webbsu qalbhom.
Kif inhu miktub: Alla tahom spirtu ta’ ngħas qawwi, għajnejn biex ma jarawx, u widnejn biex ma jisimgħux: sa llum.
U David igħid: Ħa tkun il-mejda tagħhom nassa, u nasba, u ġebla tat-tfixkil, u l-ħlas li ħaqqhom.
Ħa jiddallmu għajnejhom, biex ma jarawx, u jilwu daharhom għal dejjem.
Ngħid mela: Tfixklu biex jaqgħu? Ma jkun qatt! Imma per-mezz tal-waqgħa tagħhom ġiet is-salvazzjoni għall-Ġentili, biex tqum il-għira tagħhom.
Issa jekk il-waqgħa tagħhom kienet ta’ ġid għad-dinja, u t-telfa tagħhom kienet ta’ ġid għall-Ġentili, kemm aktar tkun il-milja tagħhom?
Għax ngħid lilkom Ġentili: Bħala appostlu tal-Ġentili, jien nagħmel ġieh lill-ministeru tiegħi.
Jekk b’xi mezz nista’ nqajjem il-għira ta’ dawk li huma demmi, u nsalva x’uħud minnhom.
Għax jekk ir-rimi tagħhom sar ir-rikonċiljazzjoni tad-dinja, x’ikun id-dħul tagħhom, ħlief ħajja mill-mewt?
Għax jekk l-ewwel frott imqaddes, imqaddsa wkoll il-għaġna, u jekk il-għerq imqaddes, hekk ukoll il-friegħi.
U jekk xi friegħi nqatgħu, u int, li int żebbuġa selvaġġa, kont imlaqqam magħhom, biex taqsam magħhom l-għerq u t-tira taż-żebbuġa.
La tiftaħarx minn fuq il-friegħi. Imma jekk tiftaħar, kun af mhux int li tarfa’ l-għerq, imma l-għerq lilek.
Int tgħid imbagħad: Inqatgħu l-friegħi, biex nitlaqqam jien.
Tajjeb; minħabba n-nuqqas tat-twemmin tagħhom inqatgħu, u int bqajt iżżomm bil-fidi tiegħek. La titkabbarx, imma ibża’:
Għax jekk Alla ma ħelishiex lill-friegħi naturali, lanqas jeħlisha lilek.
Ara, mela t-tjieba u l-qilla t’Alla: il-qilla fuq dawk li waqgħu; iżda t-tjieba fuqek, jekk int tibqa’ fit-tjieba tiegħu: inkella tkun maqtugħ int ukoll.
U dawk ukoll, jekk ma jibqgħux ma jemmnux, ikunu mlaqqmin: għax Alla jista’ jlaqqamhom mill-ġdid.
Għax jekk int kont maqtugħ miż-żebbuġa li min-natura hi selvaġġa, u kont imlaqqam kontra n-natura f’żebbuġa tajba: kemm aktar u aktar dawn, li huma naturali, ikunu mlaqqmin fiż-żebbuġa tagħhom stess?
Għax ma rridx, ħuti, li ma tkunux tafu dan il-misterju, li ma taħsbux li intom għorrief fi ħsibijietkom; ebusija parzjali waqgħet fuq Iżrael sa ma l-milja tal-Ġentili tkun ġiet;
U hekk Iżrael kollu jkun salvat: bħalma hu miktub: Minn Sijon joħroġ il-Feddej, u jwarrab il-ħażen minn Ġakobb:
Għax din hi r-rabta tiegħi magħhom, meta nneħħi dnu-biethom.
Skont l-evanġelju, huma għedewwa, minħabba fikom: iżda skont il-għażla, huma maħba minħabba missirijiethom.
Għax id-doni u s-sejħa ta’ Alla ma jittiħdux lura.
Għax bħalma fl-imgħoddi intom ma kontux tobdu lil Alla, iżda issa ksibtu l-ħniena minħabba d-diżubbidjenza tagħ-hom.
Hekk ukoll dawn issa kienu diżubbidjenti, biex permezz tal-ħniena murija lilkom huma wkoll jiksbu l-ħniena.
Għax Alla għalaqhom ilkoll fid-diżubbidjenza biex ikollu ħniena ma’ kulħadd.
O l-fond bla tarf tal-għana sew tal-għerf u kemm tal-għarfa ta’ Alla! Kemm ma jistgħux jinkixfu l-ġudizzji tiegħu, u t-triqat tiegħu ma jistgħux jitkejlu!
Għax min għaraf il-ħsieb tal-Mulej? jew min qatt tah parir?
Min qatt ta l-ewwel lilu, biex lilu jkun jistħoqqlu l-ħlas?
Għax minnu, u bih, u għalih, huma l-ħwejjeġ kollha: lilu l-glorja għal dejjem Amen.

Rumani 12

Nitlobkom mela, ħuti għall-ħniena ta’ Alla, biex tagħtu lil gisimkom bħala sagrifiċċju ħaj, imqaddes, u li jogħġob ’l Alla: li hu l-qima spiritwali tagħkom.
U la timxux max-xejra ta’ dan iż-żmien, imma nbidlu bit-tiġdid ta’ moħħkom, biex tagħrfu liema hi dik ir-rieda tajba u aċċettabbli u perfetta ta’ Alla.
Għax ngħid, permezz tal-grazzja mogħtija lili, lil kull wieħed fostkom, biex ma jqisx ruħu aktar milli hu xieraq li jqis; iżda jqis kif jixraq, skont il-qjies tal-fidi li Alla ta lil kull bniedem.
Għax bħalma għandna ħafna membri f’ġisem wieħed, u l-membri kollha m’għandhomx l-istess xogħol:
Hekk aħna, billi aħna ħafna, ġisem wieħed fi Kristu, u kull wieħed membri ta’ xulxin.
Billi għandna mela doni differenti skont il-grazzja mogħtija lilna, jekk inhi profezija, ħa nipprofetizzaw skont il-qjies tal-fidi.
Jekk ministeru, ħa nieħdu ħsieb il-ministeru tagħna: jew min igħallem, ħa jieħu ħsieb it-tagħlim.
Jew min iwissi, ħa jieħu ħsieb it-twissija: min jagħti, ħa jagħti b’idejh miftuħa, min għandu s-setgħa, bil-ħerqa; min jagħmel atti ta’ ħniena, bil-ferħa.
Ħa tkun l-imħabba bla uċuh. Stmerru dak li hu ħażin; żommu sħiħ mat-tajjeb.
Għożżu ’l xulxin b’imħabba ta’ aħwa; fil-ġieh qisu lil xulxin ogħla.
Tkunux traskurati fil-ħeġġa; kunu ferventi fl-ispirtu; taqdu lill-Mulej.
Ifirħu fit-tama, stabru fil-hemm, itolbu bla ma taqtgħu qalbkom.
Agħtu għall-ħtiġijiet tal-qaddisin; fitxxu biex turu l-ospitalità.
Bierku lil dawk li jippersegwitawkom: bierku, u la tisħtux.
Ifirħu ma’ min jifraħ; u ibku ma’ min jibki.
Aqblu ma’ xulxin. Tixtiqux ħwejjeġ kbar, agħmluha ma’ nies umli. Tgħoddux ruħkom b’għorrief fil-ħsibijiet tagħkom.
La troddu lil ħadd deni għal deni. Agħmlu ħwejjeġ onesti quddiem il-bnedmin kollha.
Jekk jista’ jkun, daqs kemm jiġi minnkom, għixu fil-paċi ma’ kulħadd.
Maħbubin tiegħi, qatt tagħmlu vendetta b’idejkom, imma agħmlu l-wisa’ għall-għadab ta’ Alla, għax hu miktub: Għalija l-vendetta, jien inħallas, igħid il-Mulej.
Għalhekk jekk l-għadu tiegħek bil-ġuħ, itimgħu; jekk inhu bil-għatx, isqih; għax billi tagħmel dan, tkun qiegħed tiġ-bor ġamar jaħraq fuq rasu.
Tintrebaħx mill-ħażen, imma irbaħ il-ħażen bit-tajjeb.

Rumani 13

Ħalli kull ruħ tkun suġġetta għal awtorità aktar għolja. Għax mhemm ebda awtorità ħlief dik ta’ Alla: l-awtoritajiet li hawn huma mwaqqfin minn Alla.
Għalhekk kull min jieqaf lil l-awtoritajiet, ikun qiegħed jieqaf lill-ordni ta’ Alla jiġbdu fuqhom il-kundanna.
Għax il-ħakkiema mhumiex biża’ għall-opra tajba, iżda għall-ħżiena. Trid mela ma tibżax minn min hu fl-awtorità? Agħmel dak li hu tajjeb, u jkollok tifħir minnu.
Għax hu l-qaddej ta’ Alla għalik għall-ġid. Iżda jekk tagħmel il-ħażin ibża’; għax mhux għalxejn għandu x-xabla: hu l-qaddej ta’ Alla, vendikatur għall-korla biex jikkastiga lil min jagħmel il-ħażin.
Għalhekk jaħtieġ li tkunu suġġetti mhux biss minħabba l-għadab ta’ Alla, imma minħabba l-kuxjenza wkoll.
Għax għalhekk għandkom tħallsu l-ħaraġ ukoll: għax huma l-ministri ta’ Alla, li jagħmlu dil-ħaġa kuljum.
Roddu mela lil kulħadd dak li jmissu: il-ħaraġ lil min imissu l-ħaraġ; it-taxxi lil min imissu t-taxxi; rispett lil min imissu rispett, il-ġieħ lil min imissu l-ġieħ.
M’għandu jkollkom tagħtu xejn lil ħadd; ħlief li tħobbu lil xulxin: għax min iħobb lil ħaddieħor iwettaq il-liġi.
Għalhekk: La tagħmilx adulterju: La toqtolx, La tisraqx, La tkunx rgħib, u jekk hemm kmandament ieħor, jinġabar fil-qosor fil-kelma: Ħobb lil għajrek bħalek innifsek.
L-imħabba ma tagħmilx deni li għajrek. Għalhekk l-imħabba hi t-twettiq tal-liġi.
U dan, għax tafu xi żmien hu; li qorob il-ħin li tqumu min-ngħas: għax issa s-salvazzjoni tagħna hi eqreb minn meta sirna nemmnu.
Il-lejl daħal sewwa; in-nhar qorob: Ħa nneħħu mela l-opri tad-dlam, u ħa nilbsu l-armi tad-dawl.
Ħa nimxu onestament, qisu bi nhar; mhux fix-xalar u s-sokor, mhux f’immoralità sesswali, mhux fil-ġlied u l-għira.
Imma ilbsu l-Mulej Ġesù Kristu, u tagħtux ħsieb tal-ġisem, biex taqtgħu x-xewqat ħżiena tiegħu.

Rumani 14

Ilqugħ lil min hu dgħajjef fil-fidi, iżda mhux għal deċiżjonijiet ta’ skrupli.
Għax wieħed jemmen li jista’ jiekol kollox; ieħor, li hu dgħajjef, jiekol il-ħaxix.
Ħalli min jiekol ma jmaqdarx lil dak li ma jikolx; u min ma jikolx ma jiġġudikax lil dak li jiekol; għax Alla laqgħu.
Int min int biex tiġġudika lill-qaddej ta’ ħaddieħor? Għal sidu jżomm wieqaf jew jaqa’. Iva, iżomm wieqaf: għax il-Mulej jiflaħ iżommu wieqaf.
Wieħed iqis jum ogħla minn ieħor: ieħor kollha l-istess: ħa jkun kull wieħed ikun żgur għalkollox f’moħħu stess.
Min iqis il-jum, iqisu għall-Mulej: u min ma jqisx il-jum, ma jqisux għall-Mulej. Min jiekol, jiekol għall-Mulej, għax jiżżi ħajr lil Alla; u min ma jikolx, ma jikolx għall-Mulej, u jiżżi ħajr lil Alla.
Għax ħadd minna ma jgħix għalih innifsu, u ħadd ma jmut għalih inifsu.
Għax jekk ngħixu, ngħixu għall-Mulej; u jekk immutu, immutu għall-Mulej: mela sew jekk ngħixu, u kemm jekk immutu, aħna tal-Mulej.
Għax għalhekk Kristu miet, u qam, u raġa’ ħa l-ħajja, biex ikun il-Mulej sew tal-mejtin u kemm tal-ħajjin.
Imma int għax tiġġudika lil ħuk? Jew int għax tmaqdar lil ħuk? Għax aħna lkoll għad irridu nidhru quddiem it-tribunal ta’ Kristu.
Għax hu miktub: Daqskemm jien ħaj, igħid il-Mulej, kull irkoppa titlewa quddiemi, u kull ilsien jistqarr ’l Alla.
Mela kull wieħed minna jagħti kont lil Alla tiegħu nnifsu.
Ħa ma niġġudikawx mela aktar lil xulxin: iżda pjuttost dan għandu jkun il-ġudizzju tagħkom, li ħadd ma jagħmel ebda tfixkil jew tiġrif fi triq ħuh.
Jien naf u nħossni żgur bil-Mulej Ġesù, li m’hemm xejn imniġġes fih innifsu: iżda għal min jaħseb li xi ħaġa hi mniġġsa, dik imniġġsa għalih.
Imma jekk ħuk jitnikket minħabba l-ikel tiegħek, int issa ma timxix bl-imħabba. La titlifx bl-ikel tiegħek lil dak li Kristu miet għalih.
Tħallux mela t-tajjeb tagħkom ikun imgħajjar.
Għax is-saltna ta’ Alla m’hijiex ikel u xorb, imma ġustizzja, u sliem, u ferħ fl-Ispirtu Qaddis.
Għax min f’dawn il-ħwejjeġ jaqdi lil Kristu jkun jogħġob lil Alla, u n-nies ma tgħid xejn fih.
Ħa nimxu mela wara dawk il-ħwejjeġ li jġibu s-sliem, u l-ħwejjeġ li bihom intejbu wieħed lil ieħor.
Tħassarx mela x-xogħol ta’ Alla minħabba l-ikel. Tas-sew kollox safi: iżda hu ħażin għal min jiekol bit-tfixkil.
Tajjeb li la tiekol laħam, u la tixrob inbid, u lanqas ħaġ’oħra li biha ħuk jista’ jitfixkel, jew joffendi ruħu, jew jiddgħajjef.
Għandek fidi? żommha għalik quddiem Alla. Hieni min ma jikkundannax lilu nnifsu b’dak li jagħżel biex jagħmel.
Imma min hu fid-dubju, jikkundanna lilu nnifsu jekk jiekol, għax ma jikolx bil-fidi: għax dak kollu li mhux mill-fidi hu dnub.

Rumani 15

Aħna mela l-qawwijin għandna nerfgħu d-dgħufija ta’ dawk li huma dgħajfa, u mhux nogħġbu lilna nfusna.
Ħalli kull wieħed minna jogħġob lil għajru għall-ġid tiegħu biex itejbu.
Għax Kristu stess ma għoġobx lilu nnifsu; iżda, bħalma hu miktub: It-tagħjir ta’ dawk li għajruk waqa’ fuqi.
Kull ma nkiteb fl-Iskrittura fl-imgħoddi, inkiteb għat-tagħlim tagħna, biex permezz tas-sabar u bis-saħħa tal-qalb li tagħmlilna l-Iskrittura, aħna jkollna t-tama.
Issa Alla tas-sabar u tal-faraġ jagħtikom li taqblu fil-fehma bejnietkom skont Kristu Ġesù.
Biex b’fehma waħda u b’fomm wieħed tigglorifikaw lil Alla, Missier Ġesù Kristu l-Mulej tagħna
Għalhekk ilqgħu lil xulxin, bħalma Kristu wkoll laqa-għna għall-glorja ta’ Alla.
Jien ngħid li Kristu sar ministru taċ-ċirkonċiżjoni għall-verità ta’ Alla, biex iwettaq il-wegħdi li saru lill-patrijarki.
U biex il-Ġentili jigglorifikaw lil Alla għall-ħniena tiegħu: kif inhu miktub: Għalhekk infaħħrek qalb il-Ġentili, u ngħanni lil ismek.
U jgħid ukoll: Ifirħu, ja Ġentili, mal-poplu tiegħu.
Ukoll: Faħħru l-Mulej, intom il-Ġentili kollha; u faħħruh, intom il-popli kollha.
Jgħid ukoll Isaija: Ikun hemm il-għerq ta’ Ġessi, u dak li jqum biex isaltan fuq il-Ġentili; fih il-Ġentili jittamaw.
U Alla tat-tama jimliekom ilkoll bil-ferħ u s-sliem permezz tal-fidi tagħkom, sabiex it-tama tagħkom toktor bil-qawwa tal-Ispirtu Qaddis.
U jiena stess ukoll żgur minnkom, ħuti, li intom ukoll mimlijin tjieba, mfawrin b’kull għerf, u li tistgħu twissu wieħed lil ieħor.
Madankollu, ħuti, ktibtilkom iżjed kif inħossha, xi drabi, bħal biex infakkarkom, minħabba l-grazzja mogħtija lili minn Alla.
Biex inkun il-ministru ta’ Kristu Ġesù għall-Ġentili; bil-li naħdem bħala ministru tal-evanġelju ta’ Alla, biex il-Ġentili jkunu sagrifiċċju li jogħġob, imqaddsin bl-Ispirtu Qaddis.
Għalhekk jien għandi għalfejn nista’ niftaħar fi Kristu Ġesù, f’dawk il-ħwejjeġ li huma ta’ Alla.
Għax m’għandix ħila nitkellem fuq ħaġa li Kristu ma għamilx bija, biex inġib il-Ġentili għall-ubbidjenza, bil-kelma u l-għemil.
Permezz ta’ sinjali kbar u għeġubijiet, bis-setgħa tal-Ispirtu ta’ Alla: hekk li minn Ġerusalemm, dawramejt sa l-Illirja, seħħ bija x-xandir tal-Evanġelju ta’ Ġesù.
Iva, tħabbatt bil-ħeġġa biex inxandar l-evanġelju, mhux fejn isem Kristu kien magħruf, biex ma nibnix fuq il-pedamenti ta’ bniedem ieħor:
Iżda bħalma hu miktub: Dawk li lilhom ma kienx im-ħabbar, jaraw: u dawk li qatt ma semgħu, jifhmu.
Għalhekk jien kont imfixkel wisq li niġi għandkom.
Imma issa, billi m’għandix aktar x’nagħmel f’dawn l-inħawi, u billi ilni ħafna snin bix-xewqa li niġi għandkom;
Meta mmur Spanja, niġi għandkom: għax nittama li fil-vjaġġ tiegħi narakom, u li nkun imqabbad it-triq ’il hemm minnkom, wara li l-ewwel inkun imtlejt xi ftit bil-ferħ li nkun magħkom.
Imma issa sejjer Ġerusalemm biex naqdi l-qaddisin.
Għax għoġob lil dawk tal-Maċedonja u tal-Akaja li jagħmlu xi kontribuzzjoni għall-qaddisin foqra li huma Ġeru-salem.
Għoġobhom tassew; u huma obbligati lejhom. Għax jekk il-Ġentili ħadu sehem mill-ħwejjeġ spiritwali tagħhom, id-dmir tagħhom hu wkoll li jgħinuhom fi ħwejjeġ tal-ġisem.
Meta mela jien inkun temmejt dan, u nkun tajthom f’idejhom il-frott ta’ dil-ġabra, ngħaddi minn għandkom għal Spanja.
U jien żgur li, meta niġi għandkom, niġi fil-milja tal-barka tal-evanġelju ta’ Kristu.
Issa nitlobkom, ħuti, f’ġieħ il-Mulej tagħna Ġesù Kristu, u f’ġieħ l-imħabba tal-Ispirtu, li titħabtu flimkien miegħi fit-talb tagħ-kom lil Alla għalija;
Biex neħles minn dawk li ma jemmnux fil-Lhudija, u biex il-qadja li għandi Ġerusalemm tkun milqugħa tajjeb mill-qaddisin;
Biex niġi ferħan għandkom, jekk Alla jrid, u nsib il-mistrieħ magħkom.
Issa Alla tas-sliem ikun magħkom ilkoll. Amen.

Rumani 16

Nirrikmandalkom ’l oħtna Febe, qaddejja tal-knisja ta’ Kenkre:
Biex tilqgħuha fil-Mulej, kif jixraq lill-qaddisin, u tgħi-nuha f’kulma għandha bżonn minn għandkom, għax hi kienet ta’ għajnuna lil ħafna, u għalija nnifsi wkoll
Sellu għal Priska u għal Akwila, ħaddiema sħabi fi Kristu Ġesù;
Li għal ħajti issugraw għonqhom: u niżżihom ħajr mhux jien waħdi, imma wkoll il-knejjes kollha tal-Ġentili;
Inselli wkoll għall-knisja li hemm f’darhom. Sellu għal Epenetus il-maħbub tiegħi, l-ewwel frott għal Kristu fl-Akaja.
Sellu għal Marija, li tħabtet ħafna għalina.
Sellu għal Andronikus u għal Ġunja, qraba tiegħi, u sħabi fil-ħabs, magħrufin fost l-appostli, li kienu wkoll qabli fi Kristu.
Sellu għal Amplijatus il-maħbub tiegħi fil-Mulej.
Sellu għal Urbanu, seħibna fix-xogħol fi Kristu, u Stakis il-maħbub tiegħi.
Sellu għal Apelle, ippruvat fi Kristu. Sellu għan-nies tad-dar ta’ Aristobolus.
Sellu għal Herdojon qaribi. Sellu għal tad-dar ta’ Narkissus, li huma fil-Mulej.
Sellu għal Trifena, u għal Trifosa, li jitħabtu fil-Mulej. Sellu għal Persis il-maħbuba tiegħi li tħabtet ħafna fil-Mulej.
Sellu għal Rufus, il-maħtur fil-Mulej u l-omm tiegħu u tiegħi.
Sellu għal Asinkritus, għal Flegon, għal Herma, għal Patroba, għal Ħerme, u l-aħwa li huma magħhom.
Sellu għal Filologus, u għal Ġulja, u Nereus, u għal oħtu; għal Olimpja, u għall-qaddisin kollha li hemm magħhom.
Sellu għal xulxin b’bewsa qaddisa. Isellu għalikom il-knejjes ta’ Kristu.
Issa nitlobkom, ħuti, għassulhom lil dawk li qegħdin jikkaġunaw firda u tfixkil, kuntrarju għad-duttrina li tgħallimtu: u warrbu minnhom.
Għax nies bħal dawn ma jaqdux lill-Mulej tagħna Kristu, imma lix-xewqat tagħhom, u bi kliem ħelu u diskors melliesi jqarrqu bil-qlub tan-nies bla ħażen.
Għax l-ubbidjenza tagħkom magħrufa ma’ kulħadd. Jien nifraħ mela bikom; imma rridkom tkunu għaqlin f’dak kollu li hu tajjeb, u bla qerq f’dak li hu ħażin.
U Alla tas-sliem ma jdumx ma jgħaffeġ lil Satana taħt riġlejkom. Il-grazzja tal-Mulej tagħna Ġesù tkun magħkom. Amen.
Timotju ħaddiem sieħbi, u Lukus, u Ġason, u Sosipatros, qraba tiegħi, isellu għalikom.
Jien Tertjus, li ktibt din l-epistola, inselli għalikom fil-Mulej.
Iselli għalikom Gajus li laqa’ lili għandu, u l-knisja koll-ha. Iselli għalikom Erastus, u l-knisja kollha. Iselli għalikom Erastus it-teżorier tal-belt, u Kwartus ħuna.
[Il-grazzja tal-Mulej tagħna Ġesù Kristu magħkom ilkoll. Amen.]
Issa lil dak li għandu s-setgħa jwettaqkom skont l-evanġelju tiegħi, u x-xandir ta’ Ġesù Kristu, skont ir-rivelazzjoni tal-misterju, li nżamm sieket sa minn żminijiet bla tmiem,
Imma issa mikxuf, u bil-kitba tal-profeti, skont l-ordni ta’ Alla ta’ dejjem, imgħarraf lill-ġnus kollha, għall-ubbidjenza tal-fidi;
Lil Alla li hu waħdu għaref, tkun il-glorja għal dejjem ta’ dejjem, b’Ġesù Kristu. Amen.