L-EVANĠELJU SKONT ĠWANNI

Dwar Dan il-Ktieb

L-enfasi speċjali ta’ Ġwanni hija d-Divinità ta’ Ġesù. Jikkonsisti prinċipalment minn Diskorsi u Konverżjonijiet ta’ Ġesù. Jagħti affarijiet li Ġesù Qal pjuttost milli affarijiet li Hu għamel. Min huwa Ġesù Kristu? Ġwanni jwieġeb din il-mistoqsija fl-ewwel kapitlu tiegħu. Juża l-kliem ta’ għanja Kristjana antika, hu jsejjaħ lil Ġesù “il-Kelma” (Logos) li biha Alla ħalaq kollox u li biha ta l-ħajja lil kulħadd (1:3, 4).
Id-data ta’ dan l-Evanġelju normalment hija assenjata għal madwar 90 W.K.
Għaliex Ġwanni kiteb? Ġwanni nnifsu jgħidilna, “… sabiex intom temmnu li Ġesù hu l-Messija Bin Alla, u biex bit-twemmin tagħkom ikollkom il-ħajja f’ismu” (Ġwanni 20:31). Kif dan huwa possibbli? Ġesù jwieġeb dik il-mistoqsija fil-kliem Tiegħu lil Nikodemu:
“¹⁶Għax Alla hekk ħabb lid-dinja, li ta l-Iben, l-uniku mnissel tiegħu, biex kull min jemmen bih ma jintilifx, iżda jkollu l-ħajja eterna” (Ġwanni 3:16).

Ħarsa Ħafifa Lejn Dan il-Ktieb

• Għaliex Luqa Kiteb Dan il-Ktieb (1:1-4)
• Għanja f’Tifħir tal-Kelma (1:1-18)
• Il-Messaġġ ta’ Ġwanni l-Battista (1:19-34)
• Ġesù Jagħżel l-Ewwel Dixxipli Tiegħu (1:35-51)
• Is-Seba’ Mirakli Speċjali ta’ Ġesù (2:1—12:50)
• L-Aħħar Ġimgħa ta’ Ġesù: It-Tiġrib u l-Mewt Tiegħu (13:1—19:42)
• Ġesù Hu Ħaj (20:1-10)
• Ġesù Jidher lid-Dixxipli Tiegħu u Jagħtihom il-Kummissjoni l-Kbira (20:11—21:25)

Ġwanni 1

Fil-bidu kienet il-Kelma, u l-Kelma kienet ma’ Alla, u l-Kelma kienet Alla.
Din kienet fil-bidu ma’ Alla.
Il-ħwejjeġ kollha bih saru, u xejn ma sar mingħajru milli sar.
Fih kienet il-ħajja; u l-ħajja kienet id-dawl tal-bnedmin.
U d-dawl jiddi fid-dlamijiet; u d-dlamijiet ma fehmuhx.
Kien hemm bniedem mibgħut minn Alla, li kien jismu Ġwanni.
Dan ġie bħala xhieda, biex jixhed għad-dawl, biex il-bnedmin kollha jemmnu bih.
Hu ma kienx dak id-dawl, iżda biex jixhed għal dak id-dawl.
Dak kien id-dawl veru, li jdawwal lil kull bniedem kien ġej fid-dinja.
Kien fid-dinja, u d-dinja saret bih; u d-dinja ma għarfitux.
Ġie fi ħwejġu, u niesu ma laqgħuhx.
Imma lil dawk li laqgħuh tahom is-setgħa li jsiru wlied Alla, dawk li jemmnu f’ismu.
Li twieldu, mhux mid-demm, u lanqas mir-rieda tal-ġisem, u lanqas mir-rieda tal-bniedem, iżda minn Alla.
U l-Kelma saret ġisem u għammar fostna, u aħna rajna l-glorja tiegħu, il-glorja li għandu mill-Missier bħala Ibnu l-waħdieni, mimli bil-grazzja u l-verità.
Ġwanni xehedlu, u għajjat, billi qal: Kien dan li għidt għalih: Dak li ġej warajja hu aqwa minni: għax kien qabli.
U mill-milja tiegħu lkoll ħadna, u grazzja fuq grazzja.
Għax il-liġi kienet mogħtija b’Mosè: iżda l-grazzja u l-verità ġew b’Ġesù Kristu.
Ħadd qatt ma ra lil Alla f’xi żmien; Alla, l-uniku Iben, li hu fi ħdan il-Missier, hu għarrfu.
U din hi x-xhieda ta’ Ġwanni, meta l-Lhud bagħtu minn Ġerusalemm xi qassisin u xi Leviti biex jistaqsuh: Int min int?
U hu stqarr, u ma ċaħadx; iżda stqarr: Jien miniex il-Kristu.
U staqsewh: X’int mela? Int Elija? U qal: Miniex. Int il-profeta? U hu wieġeb: Le.
Għalhekk qalulu: Min int? biex nistgħu nagħtu tweġiba lil dawk li bagħtuna: xi tgħid għalik innifsek?
Qal: Jiena l-leħen ta’ wieħed igħajjat fix-xagħri: Agħmlu dritta t-triq tal-Mulej, bħal ma qal Isaija l-profeta.
U l-mibgħutin kienu mill-Fariżej.
U staqsewh, u qalulu: Għaliex mela tgħammed, jekk mintix la l-Kristu, u la Elija, u lanqas dak il-profeta?
Ġwanni weġibhom, billi qal: Jiena ngħammed fl-ilma; iżda fostkom hemm wieħed, li intom ma tafuhx;
Dan hu dak, li jiġi warajja, u li jien ma jixraqlix inħollu l-qafla tal-qorq tiegħu.
Dawn il-ħwejjeġ ġraw f’Betanja n-naħa l-oħra tal-Ġordan, fejn kien igħammed Ġwanni.
L-għada Ġwanni ra ’l Ġesù ġej lejh, u qal: Ara l-Ħaruf t’Alla, li jneħħi d-dnub tad-dinja.
Dan hu dak li fuqu għidt: Warajja ġej raġel, li hu aqwa minni: għax kien qabli.
U jien ma kontx nafu: iżda biex ikun imgħarraf lil Iżrael, jien mela ġejt ngħammed fl-ilma.
U Ġwanni xehed, billi qal: Jien rajt l-Ispirtu nieżel mis-sema bħal ħamiema, u qagħad fuqu.
U jien ma kontx nafu: Iżda dak li bagħatni ngħammed fl-ilma, qalli: fuq min tara nieżel l-Ispirtu, u jibqa’ fuqu, dak hu li jgħammed bl-Ispirtu Qaddis.
U rajt, u tajt xhieda li dan hu l-Iben t’Alla.
U l-għada raġa’ kien hemm wieqaf Ġwanni, u tnejn mid-dixxipli tiegħu;
U kif ħares lejn Ġesù hu u miexi, qal: Ara l-Ħaruf ta’ Alla!
U ż-żewġ dixxipli semgħuh jitkellem, u marru wara Ġesù.
Imbagħad dar Ġesù, u rahom ġejjin warajh, u qalilhom: X’qegħdin tfittxu? Qalulu: Rabbi (li tfisser, Mgħallem) fejn toqgħod?
Qalilhom: Ejjew u taraw. Ġew u raw fejn kien joqgħod, u dak in-nhar qagħdu miegħu: għax kienet madwar l-għaxar siegħa.
Wieħed mit-tnejn li semgħu lil Ġwanni jitkellem, u mar warajh, kien Indri, ħu Xmun Pietru.
Sab dan l-ewwel lil ħuh Xmun, u qallu: Sibna l-Messija, li jfisser il-Kristu.
U ħadu għand Ġesù. U xħin Ġesù ħares lejh, qal: Int Xmun bin Ġwanni: int tissejjah Kefa, li jfisser Pietru.
L-għada ried jitlaq għall-Galilija, u sab lil Filippu, u qallu: Ejja warajja.
Issa Filippu kien minn Betsajda, il-belt ta’ Indri u ta’ Pietru.
Fillippu sab lil Natanjel, u qallu: Sibna lil dak, li minnu Mosè fil-liġi, u l-profeti, kitbu: Ġesù minn Nażaret, bin Ġużeppi.
U Natanjel qallu: Tista’ toħroġ xi ħaġa tajba minn Nażaret? Qallu Filippu: Ejja u ara.
Ra Ġesù lil Natanjel ġej lejh, u qal għalih: Ara wieħed tabilħaqq Iżraeli, li ma fihx qerq!
Natanjel qallu: Imniex għaraftni? Ġesù wieġeb u qallu: Qabel ma sejjaħlek Filippu, meta int kont taħt it-tina, rajtek.
Wieġeb Natanjel, u qallu: Rabbi, int l-Iben t’Alla: int is-Sultan ta’ Iżrael.
Wieġeb Ġesù, u qallu: Għax għidtlek, rajtek taħt it-tina, int temmen? Int għad tara ħwejjeġ akbar minn dawn.
U qallu: Tassew, tassew, ngħidilkom: Intom għad taraw is-sema miftuħ, u l-anġli ta’ Alla telgħin u neżlin fuq bin il-bniedem.

Ġwanni 2

U fit-tielet jum kien hemm tieġ f’Kana tal-Galilija; u omm Ġesù kienet hemm:
U sew Ġesù, u kemm id-dixxipli tiegħu, kienu mistednin għat-tieġ.
U meta naqashom l-inbid, omm Ġesù qaltlu: M’għandhomx inbid.
Ġesù qalilha: Mara, x’għandi x’naqsam miegħek. Is-siegħa tiegħi għadha ma waslitx.
Ommu qalet lill-qaddejja: Agħmlu kulma jgħidilkom hu.
U kien hemm sitt ġarar tal-ġebel, bħal ma jkun hemm għall-purifikazzjoni tal-Lhud, li kienu jesgħu xi g?oxrin jew tletin gallun kull waħda.
Ġesù qalilhom: Imlew il-ġarar bl-ilma. U mlewhom sax-xifer.
U qalilhom: Ħudu issa, u newlu lill-kap tal-festa. U newlulu.
Xħin il-kap tal-mejda daq l-ilma magħmul inbid, u ma kienx jaf minn fejn ġie; (iżda l-qaddejja li kienu refgħu l-ilma kienu jafu;) il-kap tal-mejda sejjaħ lill-għarus.
U qallu: Kulħadd iġib l-ewwel l-inbid it-tajjeb; u wara li jkunu xorbu ħafna, dak li hu anqas tajjeb: iżda int żammejt l-inbid tajjeb s’issa.
Dal-bidu tal-mirakli Ġesù għamel f’Kana tal-Galilija, u wera l-glorja tiegħu; u d-dixxipli tiegħu emmnu fih.
Wara li niżel Kafarnahum, hu, u ommu, u ħutu, u d-dixxipli tiegħu; u ma damux hemm ħafna jiem.
U l-għid tal-Lhud kien qrib, u Ġesù tala’ Ġerusalemm.
U fit-tempju sab bejjiegħa tal-gniedes, tan-ngħaġ u tal-ħamiem, u s-sarrafa tal-flus bil-qiegħda:
U wara li għamel sawt bil-ħbula , keċċiehom ilkoll ’il barra mit-tempju, u n-ngħaġ, u l-gniedes ukoll; u xerred il-flus tas-sarrafa, u qaleb l-imwejjed;
U lil dawk li kienu jbigħu l-ħamiem qalilhom: Neħħu dawn il-ħwejjeġ minn hawn; u tagħmlux dar Missieri dar tan-negozju.
U d-dixxipli tiegħu ftakru li nkiteb: Il-ħeġġa ta’ darek kelitni.
Imbagħad wieġbu l-Lhud u qalulu: X’sinjal turina, li tista’ tagħmel dawn il-ħwejjeġ?
Ġesù weġibhom: “Ħottu dan it-tempju, u fi tlitt ijiem nerġa’ ntellgħu.”
Għalhekk il-Lhud qalulu: “Dan it-Tempju ħa sitta u erbgħin sena biex inbena, u int se ttellgħu fi tlitt ijiem?”
Iżda hu tkellem fuq it-tempju ta’ ġismu.
Meta mela qam mill-imwiet, id-dixxipli tiegħu ftakru li kien qalilhom dan; u emmnu l-iskrittura, u l-kliem li kien qal Ġesù.
Issa meta kien Ġerusalemm fil-għid, nhar il-festa, ħafna emmnu f’ismu, meta raw il-mirakli li għamel.
Iżda Ġesù ma kienx jafda ruħu fihom, għax kien jaf lil kulħadd,
U ma kienx jaħtieġlu li xi ħadd jixhidlu fuq il-bniedem: għax kien jaf x’hemm fil-bniedem.

Ġwanni 3

Kien hemm wieħed Fariżej, jismu Nikodemu, wieħed mill-kbarat tal-Lhud:
Dan ġie għand Ġesù bil-lejl, u qallu: Rabbi, aħna nafu li inti mgħallem ġej mingħand Alla: għaliex ħadd ma jista’ jagħmel dawn il-mirakli li tagħmel int, jekk Alla ma jkunx miegħu.
Wieġeb Ġesù u qallu: Tassew, tassew ngħidlek, li, jekk wieħed ma jitwilidx mill-ġdid, ma jistax jara s-saltna ta’ Alla.
Nikodemu qallu: Kif jista’ bniedem jitwieled meta hu xiħ? Jista’ jidħol għat-tieni darba f’ġuf ommu, u jkun imwieled?
Wieġeb Ġesù: Tassew, tassew ngħidlek, li, jekk wieħed ma jitwilidx mill-ilma u l-Ispirtu, ma jistax jidħol fis-saltna ta’ Alla.
Dak li jitwieled mill-Ispirtu hu spirtu.
Tistagħġibx għax għedtlek: Jaħtieġ tkunu mwielda mill-ġdid.
Ir-riħ jonfoħ fejn irid, u int tisma’ l-ħoss tiegħu, iżda ma tafx minn fejn hu ġej, u fejn hu sejjer: hekk hu kull wieħed li jitwieled mill-Ispirtu.
Wieġeb Nikodemu, u qallu: Kif jistgħu kunu dawn il-ħwejjeġ?
Wieġeb Ġesù, u qallu: Inti mgħallem ta’ Iżrael, u ma tafx dawn il-ħwejjeġ?
Tassew, tassew, ngħidlek: Aħna nitkellmu dak li nafu, u nixhdu dak li rajna; u x-xhieda tagħna ma tilqgħuhiex.
Jekk għidtilkom ħwejjeġ tal-art, u ma temmnux, kif temmnu, jekk ngħidilkom ħwejjeġ tas-sema?
U l-ebda bniedem ma tala’ fis-sema, ħlief dak li niżel mis-sema, Bin il-bniedem li hu fis-sema.
U kif Mosè għolla s-serp fix-xagħri, hekk jaħtieġ jit-għolla Bin il-bniedem:
Biex kull min jemmen bih ma jintilifx, iżda jkollu l-ħajja ta’ dejjem.
Għax Alla hekk ħabb lid-dinja, li ta l-Iben, l-uniku mnissel tiegħu, biex kull min jemmen bih ma jintilifx, iżda jkollu l-ħajja ta’ dejjem.
Alla ma bagħatx lil Ibnu fid-dinja biex jagħmel ġudizzju mid-dinja, imma biex id-dinja ssalva permezz tiegħu.
Dak li jemmen bih mhux ikkundannat: iżda min ma jemminx hu ġa ikkundannat, għax ma emminx bl-isem tal-Iben waħdieni ta’ Alla.
U l-ġudizzju huwa dan: li d-dawl ġie fid-dinja, imma l-bnedmin ħabbew id-dlam aktar mid-dawl, għax l-għemil tagħhom kien ħażin.
Għax kull min jagħmel il-ħażen jobgħod id-dawl, u lan-qas jiġi lejn id-dawl, biex l-opri ma jkunux ikkundannati.
Iżda min jagħmel is-sewwa jiġi lejn id-dawl, biex l-opri tiegħu jidhru li huma magħmulin f’Alla.
Wara dawn il-ħwejjeġ ġie Ġesù u d-dixxipli tiegħu fl-art tal-Lhudija; u hemm qagħad magħhom, u kien igħammed.
U Ġwanni wkoll kien igħammed f’Għajnun qrib Salim, għax kien hemm ħafna ilma hemm: u kienu jiġu, u jitgħammdu.
Għax Ġwanni kien għadu mhux mitfugħ il-ħabs.
Imbagħad qamet ġlieda bejn xi dixxipli ta’ Ġwanni u l-Lhud fuq il-purifikazzjoni.
U ġew għand Ġwanni, u qalulu: Rabbi, dak li kien miegħek ’il hinn mill-Ġordan, li int xhidtlu, ara, qiegħed igħammed, u kulħadd sejjer għandu.
Wieġeb Ġwanni, u qal: Wieħed ma jista’ jieħu xejn, jekk ma jkunx mogħti lilu mis-sema.
Intom infuskom tixhduli, li jien għidt: Miniex il-Kristu, iżda li jien mibgħut qablu.
Min għandu l-għarusa hu l-għarus: iżda l-ħabib tal-għarus, li qiegħed fejnu u jisimgħu, jifraħ ħafna minħabba leħen il-għarus: dan il-ferħ tiegħi mela seħħ.
Hu jaħtieġ jikber, imma jien naħtieġ nonqos.
Dak li ġej mill-għoli, hu fuq kulħadd: min hu mill-art hu tal-art, u fuq l-art jitkellem: dak li ġej mis-sema hu fuq kulħadd.
U x’ra u x’sama’, dak jixhed; u ħadd ma jilqa’ x-xhieda tiegħu.
Dak li laqa’ x-xhieda tiegħu wettaq illi Alla hu tassew.
Għax dak li Alla bagħtu, jitkellem il-kliem ta’ Alla: għax hu ma jagħtix l-Ispirtu bil-kejl.
Il-Missier iħobb l-Iben, u tah kollox f’idejh.
Dak li jemmen bl-Iben għandu l-ħajja ta’ dejjem; u dak li ma jobdix lil Iben ma jarax il-ħajja; iżda għadab Alla jgħammar fuqu.

Ġwanni 4

Mela meta kien jaf il-Mulej kif il-Fariżej kienu semgħu li Ġesù kien qiegħed jagħmel u jgħammed iżjed dixxipli minn Ġwanni,
Għalkemm tabilħaqq, Ġesù nnifsu ma kienx igħammed, imma d-dixxipli tiegħu,
Ħalla l-Lhudija, u raġa’ mar fil-Galilija.
U kien jaħtieġlu jgħaddi mis-Samarija.
Imbagħad wasal f’belt tas-Samarija, li kien jisimha Sikar, qrib il-qasam li Ġakobb ta lil ibnu Ġużeppi.
Issa l-bir ta’ Ġakobb kien hemm. Mela Ġesù, billi kien għajjien bil-vjaġġ tiegħu, qagħad hekk bil-qiegħda fuq il-bir: u kienet madwar is-sitt siegħa.
Ġiet hemm mara mis-Samarija timla l-ilma, u qalilha Ġesù: Agħtini nixrob.
Għax id-dixxipli tiegħu kienu marru l-belt jixtru l-ikel.
Qaltlu mbagħad il-mara Samaritana: Kif int, li int Lhudi, titlob tixrob lili, mara Samaritana? Għax il-Lhud ma jagħmluhiex mas-Samaritani.
Ġesù wieġeb, u qalilha: Kieku kont taf il-għotja ta’ Alla, u min hu dak li qallek: Agħtini nixrob; kont titolbu int, u kien jagħtik ilma ħaj.
Qaltlu l-mara: Sinjur, int m’għandikx biex timla, u l-bir hu fond: mnejn mela għandek dan l-ilma ħaj?
Jaqaw int akbar minn Ġakobb missierna, li tana l-bir, u xorob minnu hu stess, uliedu, u l-bhejjem tiegħu?
Wieġeb Ġesù, u qalilha: Kull min jixrob minn dal-bir jarġa’ jieħdu l-għatx:
Iżda kull min jixrob mill-ilma li nagħtih jien ma jieħdu għatx qatt; imma l-ilma li nagħtih jien ikun fih għajn ta’ ilma ġieri sal-ħajja ta’ dejjem.
Qaltlu l-mara: Sinjur, agħtini dan l-ilma, biex ma jeħodnix għatx, u lanqas niġi hawn nimla.
Ġesù qalilha: Mur, sejjaħ lil żewġek, u ejja hawn.
Wieġbet il-mara, u qalet: M’għandix raġel. Qalilha Ġesù: Sewwa għidt, m’għandix raġel:
Għax ħamest irġiel kellek; u dak li għandek issa mhux żewġek: dan sewwa għidt.
Qaltlu l-mara: Sinjur, nara li inti profeta.
Missirijietna qiemu fuq dil-muntanja; u intom tgħidu, li f’Ġerusalemm hu l-lok fejn wieħed għandu jagħti qima.
Qalilha Ġesù: Emminni, mara: jiġi żmien meta mhux fuq din il-muntanja tagħtu qima lill-Missier, anqas f’Ġerusalemm,
Intom tqimu dak li ma tafux: aħna nafu dak li nqimu: għax is-salvazzjoni tiġi mil-Lhud.
Imma tiġi s-siegħa, u issa hi, meta dawk li tassew iqimu, iqimu l-Missier fl-ispirtu u fil-verità: għax bħal dawn ifittex il-Missier biex iqimuh.
Alla huwa spirtu, u dawk li jqimuh għandhom iqimuh fl-ispirtu u l-verità.
Qaltlu l-mara: Naf li għandu jiġi l-Messija, li jissejjah Kristu: meta jiġi, igħarrafna kollox.
Qalilha Ġesù: Hu jien li qiegħed nitkellem miegħek.
U f’dak il-waqt ġew id-dixxipli tiegħu, u stagħġbu għax kien jitkellem mal-mara: iżda ħadd ma qal: Xi trid? Jew: Għaliex qiegħed titkellem magħha?
Il-mara mbagħad ħalliet il-ġarra tagħha, u marret il-belt, u qalet lin-nies:
Ejjew, araw raġel li qalli kulma għamilt: dan mhux il-Kristu?
Imbagħad ħarġu mill-belt, u ġew ħdejh.
F’dak il-waqt id-dixxipli kienu jitolbuh, billi jgħidu: Rabbi, kul.
Iżda hu qalilhom: Jien għandi x’niekol ikel li intom ma tafux.
Id-dixxipli għalhekk qalu lil xulxin: Jaqaw ġieblu xi ħadd x’jiekol?
Ġesù qal: “L-ikel tiegħi hu li nagħmel ir-rieda ta’ min bagħatni u li nwassal fit-tmiem l-opra tiegħu.
Ma tgħidux intom: Għad baqa’ erba’ xhur, u mbagħad jiġi l-ħsad? Ara, jien ngħidilkom: Erfgħu għajnejkom, u ħarsu lejn l-għelieqi; għax diġà huma bojod għall-ħasda.
U dak li jaħsad jieħu ħlas, u jiġbor il-frott għall-ħajja ta’ dejjem: biex min jiżra’ jifraħ hu wkoll bħal min jaħsad.
Għax f’dan hu minnu dak il-qawl: Wieħed jiżra’, u ieħor jaħsad.
Jien bgħattkom taħsdu dak li intom ma ħdimtux għalih: irġiel oħrajn ħadmu, u intom dħaltu f’xogħolhom.
U ħafna Samaritani minn dik il-belt emmnu bih minħabba kliem il-mara, li xehdet: Qalli kulma għamilt.
Għalhekk meta s-Samaritani ġew għandu, talbuh biex jibqa’ magħhom: u baqa’ magħhom jumejn.
U wisq aktar emmnu minħabba kliemu;
U qalu lill-mara: Issa nemmnu, mhux minħabba klie-mek: għax aħna nfusna smajnieh, u nafu li dan hu tassew is-Salvatur tad-dinja.
Issa wara jumejn telaq minn hemm, u mar il-Galilija.
Għax Ġesù nnifsu xehed, li profeta m’għandux ġieh f’pajjiżu stess.
Imbagħad meta ġie l-Galilija, laqgħuh il-Galilin, billi kienu raw kulma kien għamel Ġerusalemm, fil-festa: għax huma wkoll marru għall-festa.
Ġesù mela raġa’ ġie f’Kana tal-Galilija, fejn kien għamel l-ilma nbid. U kien hemm wieħed uffiċjal tas-sultan, li ibnu kien marid f’Kafarnahum.
Malli dan sama’ li Ġesù ġie mil-Lhudija għall-Galilija, mar għandu, u talbu biex jinżel, u jfejjaqlu lil ibnu: għax kien wasal biex imut.
Qallu mbagħad Ġesù: Jekk ma tarawx sinjali u għe-ġubijiet, ma temmnux.
Qallu l-uffiċjal tas-sultan: Sinjur, inżel qabel ma jmut it-tifel tiegħi.
Qallu Ġesù: Mur; ibnek ħaj. U r-raġel emmen il-kelma li qallu Ġesù, u telaq.
U hu u sejjer ’l isfel, il-qaddeja tiegħu ltaqgħu miegħu, u qalulu: Ibnek ħaj.
Staqsiehom imbagħad is-siegħa meta beda għaddej għall-aħjar. U qalulu: Il-bieraħ fis-seba’ siegħa ħallieh id-deni.
Hekk il-missier għaraf li kien fl-istess ħin, li fih qallu Ġesù: Ibnek ħaj: u emmen hu, u daru kollha.
Dan hu t-tieni miraklu li għamel Ġesù, meta mil-Lhudija ġie fil-Galilija.

Ġwanni 5

Wara dan kien hemm festa tal-Lhud; u Ġesù tala’ Ġerusalem.
Issa f’Ġerusalemm ħdejn suq in-ngħaġ hemm menqgħa, li jgħidulha fil-lsien Lhudi Betesda, u li għandha ħames loġoġ.
F’dawn kien ikun hemm mixħuta kotra kbira ta’ nies morda, għomja, zopop, u mifluġin, jistennew it-taħrik tal-ilma.
Għax anġlu kien jinżel f’xi żmien fil-menqgħa, u jħar-rek l-ilma; u min imbagħad kien jinżel l-ewwel wara t-taħrik tal-ilma kien ifiq minn kull mard li kien ikollu.
U kien hemm wieħed raġel, li kellu marda għal tmienja u tletin sena.
Xħin rah Ġesù mixħut, u sar jaf li kien ilu żmien twil marid, qallu: Trid tfiq?
Wieġbu l-marid: Sinjur, m’għandi ebda bniedem, meta jitħarrek l-ilma, biex iqiegħdni fil-menqgħa: iżda waqt li nkun ġej jien, jinżel ieħor qabli.
Qallu Ġesù: Qum, ħu l-mitraħ tiegħek, u imxi.
U minnufih ir-raġel fieq, u ħa l-mitraħ tiegħu, u mexa: Issa dak in-nhar kien is-sabat.
Il-Lhud imbagħad qalu lil dak li kien imfejjaq: Illum is-sabat; ma jiswiex li ġġorr il-mitraħ tiegħek.
Weġibhom: Dak li fejjaqni qalli hu stess: Ħu l-mitraħ tiegħek, u imxi.
Imbagħad staqsewh: Min hu dak il-bniedem li qallek: Ħu l-mitraħ tiegħek, u imxi?
U dak li kien imfejjaq ma kienx jaf min kien: għax Ġesù kien warrab, billi folla ta’ nies kienet f’dak il-post.
Wara Ġesù sabu fit-tempju, u qallu: Ara, int fiqt: la tid-nibx iżjed, li ma jiġrilikx xi ħaġa agħar.
Telaq ir-raġel u qal lil-Lhud li kien Ġesù li fejqu.
U għalhekk il-Lhud ippersegwitaw lil Ġesù, u fittxu li joqtluh, għax għamel dan fis-sabat.
Iżda Ġesù weġibhom: Missieri għadu jaħdem s’issa, u jien qiegħed naħdem.
Għalhekk il-Lhud fittxu iżjed li joqtluh, għax mhux biss kiser is-sabat, imma wkoll għax qal li Alla hu Missieru, u b’hekk għamel lilu nnifsu ugwali ma’ Alla.
Imbagħad wieġeb Ġesù, u qalilhom: Tassew, tassew, ngħidilkom: L-Iben ma jista’ jagħmel xejn minnu nnifsu, għajr dak li jara l-Missier jagħmel: għax dawk il-ħwejjeġ kollha li jagħmel, dawn l-Iben jagħmel ukoll.
Għax il-Missier iħobb l-Iben, u jurih il-ħwejjeġ kollha li hu nnifsu jagħmel: u għad jurih opri akbar minn dawn, biex tistagħġbu.
Għax bħalma l-Missier iqajjem il-mejtin, u jagħtihom il-ħajja; hekk ukoll l-Iben jagħti l-ħajja lil min irid.
Għax il-Missier ma jagħmel ġudizzju minn ħadd, iżda ta kull ġudizzju lil Ibnu:
Biex il-bnedmin kollha jonoraw lill-Iben, bħal ma jonoraw lill-Missier. Min ma jonorax lill-Iben, ma jonorax lill-Missier li bagħtu.
Tassew, tassew, ngħidilkom: Min jisma’ kelmti, u jem-men f’dak li bagħatni, ikollu l-ħajja ta’ dejjem, u ma jiġix għall-kundanna; iżda jgħaddi mill-mewt għall-ħajja.
Tassew, tassew, ngħidilkom: Tasal is-siegħa, u issa hi, meta l-mejtin jisimgħu leħen l-Iben ta’ Alla: u dawk li jisimgħu jgħixu.
Għax bħalma l-Missier għandu l-ħajja fih innifsu, hekk ukoll ta lil Iben li jkollu l-ħajja fih innifsu,
U tah ukoll is-setgħa li jagħmel ġudizzju, għax hu Bin il-bniedem.
La tistagħġbux b’dan: tiġi siegħa meta dawk kollha li jkunu fl-oqbra jisimgħu leħnu,
U joħorġu: dawk li jkunu għamlu t-tajjeb għall-qawmien tal-ħajja, imma dawk li jkunu għamlu l-ħażin għall-qawmien tal-ġudizzju.
Xejn ma nista’ nagħmel minni nnifsi: kif nisma’, na-għmel ġudizzju: u l-ħaqq tiegħi hu ġust; għax ma nfittixx ir-rieda tiegħi, iżda r-rieda tal-Missier li bagħatni.
Jekk jien nixhed għalija nnifsi, ix-xhieda tiegħi ma tiswiex.
Hemm ħaddieħor li jixhidli; u naf li x-xhieda li jagħti fuqi tiswa.
Intom bgħattu għand Ġwanni, u hu ta’ xhieda għall-verità.
Iżda jien ma nilqax xhieda minn għand il-bniedem: iżda ngħid dawn il-ħwejjeġ, biex ikunu salvati.
Hu kien lampa li tixgħel u tiddi: u intom ridtu tifirħu għal siegħa bid-dawl tiegħu.
Iżda jien għandi xhieda akbar minn dik ta’ Ġwanni: għax l-opri li bagħtni ntemm Missieri, jiġifieri dawn l-istess opri li jiena qiegħed nagħmel, jixhduli li l-Missier bagħatni.
U l-Missier innifsu, li bagħatni, xehedli. Intom la qatt smajtu leħnu xi darba, u lanqas rajtu s-sura tiegħu.
U l-kelma tiegħu m’għandkomx tgħammar fikom; għax dak li bagħat hu, intom ma temmnuhx.
Intom qegħdin tfittxu fl-iskrittura; għax fiha taħsbu li għandkom il-ħajja ta’ dejjem: hija hi li tagħti xhieda tiegħi.
U intom ma tridux tiġu għandi, biex ikollkom il-ħajja.
Foħrija ma niħux minn għand il-bnedmin.
Iżda għaraftkom, illi m’għandkomx l-imħabba ta’ Alla.
Jien ġejt f’isem Missieri, u ma tilqgħunix: jekk ħadd-ieħor jiġi f’ismu, lil dan tilqgħuh.
Kif tistgħu temmnu, intom li tirċievu glorja minn għand xulxin, u ma tfittxux il-glorja li tiġi minn Alla biss?
La taħsbux li jien sejjer nixlikom lill-Missier: hemm wieħed jixlikom, Mosè, li tittamaw fih.
Għax kieku kontu temmnu f’Mosè kontu temmnu fija wkoll, għax Mosè fuqi kiteb. Imma intom ma temmnux dak li kitbilkom hu, kif se temmnu dak li ngħidilkom jien?
Iżda jekk ma temmnux il-kitba tiegħu, kif temmnu kliemi?

Ġwanni 6

Wara dan Ġesù mar in-naħa l-oħra tal-baħar tal-Galilija, li hu l-baħar tat-Tiberija.
U ġemgħa kbira ta’ nies marret warajh, għax kienu raw il-mirkali li għamel ma’ dawk li kienu morda.
U Ġesù tala’ fuq muntanja, u hemm qagħad bil-qiegħda mad-dixxipli tiegħu.
U l-għid, festa tal-Lhud, kien qrib.
Xħin Ġesù rafa’ għajnejh, u ra li kienet ġejja ġemgħa kbira ta’ nies, qal lil Filippu: Mnejn nixtru l-ħobż, biex jieklu dawn?
U dan qalu biex iġarrbu; għax hu kien jaf x’sa jagħmel.
Wieġbu Filippu: Mitejn dinier ħobż m’humiex biżżejjed għalihom, biex kull wieħed minnhom jieħu ftit.
Wieħed mid-dixxipli tiegħu, Indri, ħu Xmun Pietru, qallu:
Hawn tfajjel, li għandu ħames ħobżiet tax-xgħir, u żewġ ħutiet żgħar: imma dawn x’inhuma għal dawn kollha?
U Ġesù qal: Ġagħlu n-nies joqogħdu bil-qiegħda. Issa kien hemm ħafna ħaxix hemmhekk. U l-irġiel, li kienu jgħoddu madwar ħamest elef, qagħdu bil-qiegħda.
U Ġesù ħa l-ħobżiet; u wara li radd il-ħajr, qassam lid-dixxipli, u d-dixxipli lil dawk li kienu bil-qiegħda; u hekk ukoll mill-ħut kemm riedu.
Meta xebgħu, qal lid-dixxipli tiegħu: Iġbru l-bċejjeċ li fadal, biex ma jinħela xejn.
Ġabruhom mela, u mlew tnax-il qoffa bil-bċejjeċ tal-ħames ħobżiet tax-xgħir, li kienu baqgħu żejda lil dawk li kielu.
Għalhekk dawk in-nies, meta raw dan is-sinjal li għamel Ġesù, qalu: ‘Dan hu tassew il-profeta li għandu jiġi fid-dinja!’
Imma Ġesù, meta ntebah li kienu ġejjin biex jaħtfuh ħalli jagħmluh sultan, reġa’ warrab waħdu lejn il-għoljiet.
U mbagħad xħin sar filgħaxija, niżlu d-dixxipli tiegħu lejn il-baħar;
U rikbu dgħajsa, u għaddew il-baħar għal Kafarnahum. U issa kien dalam, u Ġesù kien għadu ma ġiex fejnhom.
U l-baħar qam minħabba riħ qawwi li kien jonfoħ.
Għalhekk meta kienu qadfu ħamsa u għoxrin jew tletin stadju, jaraw lil Ġesù miexi fuq il-baħar, u riesaq lejn id-dgħajsa: u beżgħu.
Iżda hu qalilhom: Jien hu; la tibżgħux.
Imbagħad xtaqu jeħduh fid-dgħajsa: u minnufih waslet id-dgħajsa fl-art fejn kienu sejrin.
L-għada, meta n-nies li kienu n-naħa l-oħra tal-baħar raw li ma kienx hemm dgħajsa oħra hemm, ħlief dik li fiha kienu daħlu d-dixxipli, u li Ġesù ma kienx daħal fid-dgħajsa mad-dixxipli tiegħu, imma d-dixxipli kienu marru weħidhom;
Għalkemm kienu ġew dgħajjes oħra minn Tiberja ħdejn il-post fejn kienu kielu l-ħobż, wara li l-Mulej kien radd il-ħajr:
Meta mela n-nies raw li Ġesù ma kienx hemm, u lanqas id-dixxipli tiegħu, huma wkoll rikbu d-dgħajjes, u ġew Kafar-nahum, ifittxu lil Ġesù.
U xħin sabuh in-naħa l-oħra tal-baħar, qalulu: Rabbi, meta ġejt hawn?
Weġibhom Ġesù, u qal: Tassew, tassew, ngħidilkom: Intom tfittxuni, mhux għax rajtu l-mirakli, imma għax kiltu mill-ħobżiet, u xbajtu.
La taħdmux għall-ikel li jintemm, imma għal dak l-ikel li jdum għall-ħajja ta’ dejjem, li jagħtikom Bin il-bniedem: għax fuq Alla l-Missier qiegħed is-siġill tiegħu.
Mbagħad staqsewh: X’għandna nagħmlu biex nagħmlu l-opri ta’ Alla?
Weġibhom Ġesù: L-opra ta’ Alla hija din: li intom tem-mnu f’dak li hu bagħat.
Huma mela qalulu: X’sinjal turi mela, biex naraw, u nemmnuk? X’inhu li tagħmel?
Missirijietna kielu l-manna fix-xagħri; kif inhu miktub: Tahom jieklu ħobż mis-sema.
Imbagħad qalilhom Ġesù: Tassew, tassew, ngħidilkom: Ma takomx Mosè dak il-ħobż mis-sema; iżda Missieri jagħti-kom il-veru ħobż mis-sema.
Għax il-ħobż t’Alla hu dak li jinżel mis-sema, u jagħti l-ħajja lid-dinja.
Imbagħad qalulu: Mulej, agħtina dejjem dal-ħobż.
U Ġesù qalilhom: Jien hu l-ħobż tal-ħajja; min jiġi għandi ma jieħdu ġuħ qatt; u min jemmen fija ma jieħdu għatx qatt.
Iżda jien għidtilkom: Li intom ukoll rajtuni, u ma em-mintux.
Dawk kollha li jagħtini Missieri jiġu għandi, u min jiġi għandi ma nkeċċiħx ’il barra.
Għax jien inżilt mis-sema, mhux biex nagħmel ir-rieda tiegħi, imma r-rieda ta’ min bagħatni.
Din hi r-rieda tal-Missier li bagħatni, li ma nitlef xejn minn dak kollu li tani, imma li nqajmu fl-aħħar jum.
U din hi r-rieda ta’ Missieri: li kull min jara lill-Iben u jemmen fih, ikollu l-ħajja ta’ dejjem u jiena nqajmu mill-imwiet fl-aħħar jum.
Imbagħad il-Lhud gergru għalih, għax qal: Jien hu l-ħobż li nżilt mis-sema.
U qalu: dan mhux Ġesù, bin Ġużeppi, li tiegħu aħna nafu l-missieru u l-ommu? Kif mela qal: Jien inżilt mis-sema?
Wieġeb Ġesù: La tgergrux bejnietkom.
Ħadd ma jista’ jiġi għandi, jekk Missieri li bagħatni ma jiġbdux: u jien inqajmu fl-aħħar jum.
Hu miktub fil-profeti: U jkunu kollha mgħallmin minn Alla. Kull min mela sama’ u tgħallem mill-Missier, jiġi għandi.
Mhux għax xi ħadd ra l-Missier, ħlief dak li hu minn Alla: dan ra l-Missier.
Tassew, tassew, ngħidilkom: Min jemmen fija għandu l-ħajja ta’ dejjem.
Jien hu dak il-ħobż tal-ħajja.
Missirijietkom kielu l-manna fix-xagħri, u mietu.
Dan hu l-ħobż li nieżel mis-sema, biex wieħed jiekol minnu, u ma jmutx.
Jien hu l-ħobż ħaj li nżilt mis-sema: jekk xi ħadd jiekol minn dal-ħobż, igħix għal dejjem: u l-ħobż li nagħti jien hu laħmi, li nagħti għall-ħajja tad-dinja.
Il-Lhud mela ġġieldu bejniethom, billi qalu: Kif jista’ dan jagħtina nieklu laħmu?
Qalilhom imbagħad Ġesù: Tassew, tassew, ngħidilkom: Jekk ma tiklux il-laħam ta’ Bin il-bniedem, u tixorbu demmu, ma jkollkomx ħajja fikom.
Min jiekol laħmi, u jixrob demmi, għandu l-ħajja ta’ dejjem; u jien inqajmu fl-aħħar jum.
Għax laħmi hu ikel tassew; u demmi hu xorb tassew.
Min jiekol laħmi, u jixrob demmi, igħammar fija, u jiena fih.
Bħal ma bagħatni l-Missier il-ħaj, u jien ħaj bil-Missier: hekk min jiekol lili, hu wkoll ikollu l-ħajja bija.
Dan hu dak il-ħobż li niżel mis-sema: mhux bħal manna li kielu missirijietkom, u mietu: min jiekol minn dal-ħobż jibqa’ ħaj għal dejjem.
Dawn il-ħwejjeġ qalhom fis-sinagoga, hu u jgħallem f’Kafarnahum.
Ħafna mela mid-dixxipli tiegħu, kif semgħu dan, qalu: Dan hu kliem iebes; min jista’ jisimgħu?
Xħin Ġesù għaraf fih innifsu li d-dixxipli tiegħu kienu jgergru fuq dan, qalilhom: Dan qiegħed ifixkilkom?
Jekk mela taraw Bin il-bniedem tiela’ fejn kien qabel?
Hu l-ispirtu li jagħti l-ħajja, il-ġisem ma jiswa għal xejn. Il-kliem li jiena għedtilkom huwa spirtu u ħajja.
Iżda hemm xi wħud fostkom li ma jemmnux. Għaliex Ġesù kien jaf sa mill-bidu min kienu dawk li ma emmnux u min kien dak li kellu jittradih.
U qal: Għalhekk għidtilkom, li ħadd ma jista’ jiġi għandi, jekk ma jingħatalux mill-Missier.
Minn dak il-waqt ħafna mid-dixxipli tiegħu telqu lura, u ma mxewx iżjed miegħu.
Imbagħad Ġesù qal lit-tnax: Tridux tmorru intom ukoll?
Wieġbu Xmun Pietru: Mulej, għand min immorru? Int għandek il-kliem tal-ħajja eterna.
U aħna nemmnu u żguri li int dak il-Kristu, Bin Alla l-ħaj.
7 Weġibhom Ġesù: Mhux jien għażiltkom it-tnax, u wie-ħed minnkom hu xitan?
7 Kien qiegħed igħid għal Ġuda Iskarjota, bin Xmun: għax hu kien li sa jittradih, billi kien wieħed mit-tnax.

Ġwanni 7

Wara dawn il-ħwejjeġ Ġesù kien idur fil-Galilija: għax ma kienx irid idur fil-Lhudija, għaliex il-Lhud kienu jfittxu biex joqtluh.
Kienet qorbot għal-Lhud il-festa tal-Għerejjex,
U ħutu qalulu: Itlaq minn hawn u mur il-Lhudija, biex id-dixxipli tiegħek ukoll jaraw l-opri li qiegħed tagħmel.
Għax ħadd ma jagħmel xejn bil-moħbi jekk irid ikun magħruf minn kulħadd. Ladarba qiegħed tagħmel dan kollu, uri ruħek lid-dinja.
Għax lanqas ħutu ma kienu jemmnu fih.
Imbagħad qalilhom Ġesù: waqti għadu ma wasalx: imma waqtkom imhejji.
Id-dinja ma tistax tobgħodkom; iżda lili tobgħodni, għax jien nixhed għaliha, illi l-opri tagħha huma ħżiena.
Itilgħu intom għall-festa: jien ma nitlax għalissa għal din il-festa: għax waqti għadu ma wasalx.
Wara li qalilhom dawn il-kelmiet baqa’ fil-Galilija.
Imma wara li ħutu telgħu, imbagħad tala’ hu wkoll għall-festa, mhux bid-dieher, imma qisu bil-moħbi.
Imbagħad il-Lhud fittxuh fil-festa, u qalu: Fejn hu?
U kien hemm ħafna tgergir fuqu fost in-nies: għax x’uħud kienu jgħidu: Hu raġel tajjeb; u oħrajn kienu jgħidu: Le; iżda jqarraq bin-nies.
Madankollu ħadd ma tkellem fil-beraħ fuqu minħabba l-biża’ tal-Lhud.
Issa għall-ħabta ta’ nofs il-festa, Ġesù tala’ fit-tempju, u għallem.
U l-Lhud stagħġbu, billi qalu: Dar-raġel kif jaf it-tagħlim, bla qatt ma tgħallem?
Ġesù weġibhom, u qal: It-tagħlim tiegħi mhux tiegħi, imma ta’ min bagħatni.
Jekk xi ħadd jagħmel ir-rieda tiegħu, jagħraf jekk dan it-tagħlim hux minn Alla, jew jekk jien nitkellimx minni nnifsi.
Min jitkellem minnu nnifsu jfittex il-glorja tiegħu stess: iżda min ifittex il-glorja ta’ min bagħatu, dan ta’ minn jemmnu, u l-ebda qerq ma jinsab fih.
Ma takomx Mosè l-liġi, u madankollu ħadd minnkom ma jħares il-liġi? Għaliex tfittxu li toqtluni?
In-nies wieġbu, u qalu: Int għandek demonju: min qiegħed ifittex li joqtlok?
Wieġeb Ġesù, u qalilhom: Għemil wieħed għamilt, u lkoll tistagħġbu.
Għalhekk Mosè takom iċ-ċirkonċiżjoni; mhux għax ġej minn Mosè, iżda mill-missirijiet; u intom tagħmlu ċirkonċiżjoni lill-bniedem fis-sabat.
Jekk wieħed jagħmlulu ċ-ċirkonċiżjoni fis-sabat, biex il-liġi ta’ Mosè ma tinkisirx; teħduha kontra tiegħi, għax fejjaqt bniedem kollu fis-sabat?
Tagħmlux ġudizzju fuq li jidher, iżda agħmlu ġudizzju ġust.
Qalu mbagħad x’uħud minn Ġerusalemm: Dan mhux dak, li qegħdin ifittxu biex joqtluh?
Iżda arawh jitkellem fid-dieher, u ma jgħidulu xejn. Jaqaw jafu tassew il-kbarat li dan hu l-Kristu stess?
Iżda dan nafu mnejn hu: iżda meta jiġi Kristu, ħadd ma jkun jaf mnejn hu.
Imbagħad għajjat Ġesù fit-tempju hu u jgħallem, billi qal: Lili tafuni, u tafu mnejn jien: u jien ma ġejtx minni nnifsi, iżda dak li bagħatni hu tassew, u intom ma tafuhx.
Jiena nafu: għax ġej minn għandu, u hu bagħatni.
Imbagħad fittxu li jaqbduh: imma ħadd ma medd idejh fuqu, għax is-siegħa tiegħu kienet għadha ma waslitx.
U ħafna min-nies emmnu fih, u qalu: Meta jiġi l-Kristu, jagħmel mirakli aktar minn dawk li dar-raġel għamel?
Il-Fariżej semgħu li n-nies bdew jitkellmu taħt l-ilsien dawn il-ħwejjeġ fuqu; u l-qassisin il-kbar u l-Fariżej bagħtu xi għases biex jaqbduh.
Imbagħad qalilhom Ġesù: Għadni magħkom għal ftit żmien, u mbagħad immur għand min bagħatni.
Tfittxuni, u ma ssibunix: u fejn inkun jien, hemm intom ma tistgħux tiġu.
Imbagħad qalu l-Lhud bejniethom: Fejn sejjer, biex ma nsibuhx? Sejjer għand dawk li huma mxerrdin qalb il-Ġentili, u jgħallem il-Ġentili?
Xi kliem hu dan li qal: Tfittxuni, u ma ssibunix; u fejn inkun jien, hemm intom ma tistgħux tiġu?
Fl-aħħar jum tal-festa, il-jum il-kbir, qam Ġesù bil-wieqfa u għajjat, billi qal: Jekk xi ħadd għandu l-għatx, ħa jiġi għandi, u jixrob.
Min jemmen fija, kif qalet l-iskrittura, minnu joħorġu xmajjar ta’ ilma ħaj.
Imma dan qalu għall-Ispirtu, li kellhom jieħdu dawk li jemmnu fih: għax kien għadu ma ngħatax l-Ispirtu Qaddis, billi Ġesù kien għadu mhux igglorifikat.
Għalhekk ħafna min-nies, meta semgħu dal-kliem, qalu: Tassew dan hu l-Profeta.
Oħrajn qalu: Dan hu l-Kristu. Imma x’uħud qalu: Huwa Kristu sa jiġi mill-Galilija.
Ma qalitx l-iskrittura: Illi Kristu jiġi min-nisel ta’ David, u mir-raħal ta’ Betlehem, fejn kien David?
U hekk kien hemm firda fil-poplu minħabba fih.
U x’uħud minnhom riedu jaqbduh; iżda ħadd ma medd idejh fuqu.
Imbagħad ġew il-għases għand il-qassisin il-kbar u l-Fariżej; u qalulhom: Għax ma ġibtuhx?
Wieġbu l-għases: Qatt ebda bniedem ma tkellem bħal dal-bniedem.
Wiġbuhom imbagħad il-Fariżej: Intom ukoll imqarrqin?
Hemm xi ħadd mill-kbarat jew mill-Fariżej li emmen fih?
Imma dawn in-nies li ma jafux il-liġi huma misħutin.
Nikodemu wieħed minnhom, li kien ġie għand Ġesù bil-lejl qalilhom:
Jaqaw il-liġi tagħmel ġudizzju minn xi bniedem, qabel ma tisimgħu u tkun taf x’għamel?
Wieġbu, u qalulu: Int ukoll mill-Galilija? Fittex u ara: għax mill-Galilija ma jqum ebda profeta.
[U telaq kulħadd lejn daru.

Ġwanni 8

Mar Ġesù lejn il-għolja taż-Żebbuġ.
U filgħodu kmieni raġa’ ġie fit-tempju, u l-poplu kollu ġie għandu; u qagħad bil-qiegħda, u għallimhom.
U l-iskribi u l-Fariżej ġiebu mara maqbuda fl-adulterju; u meta qegħduha fin-nofs,
Qalulu: Mgħallem, dil-mara nqabdet fl-att tal-adulterju.
Issa Mosè fil-liġi ordnalna, li bħal dawn inħaġġruhom: Iżda int xi tgħid?
Dan qaluh, huma u jġarrbuh, biex ikollhom fuqiex jixluh. Imma Ġesù tmejjel ’l isfel, u kiteb b’sebgħu fl-art, qisu ma semagħhomx.
Iżda meta baqgħu jistaqsuh, twaqqaf, u qalilhom: Min fostkom hu bla dnub, jixħtilha ġebla l-ewwel wieħed.
U raġa’ tmejjel, u kiteb fl-art.
U huma li semgħu dan, billi kienu ikkundannati mill-kuxjenza tagħhom stess, ħarġu wieħed wieħed, ibda mill-anzjani, sa l-aħħar wieħed: u Ġesù baqa’ waħdu, u l-mara wieqfa fin-nofs.
X’ħin Ġesù qam, u ma ra lil ħadd ħlief il-mara, qalilha: Mara, fejn huma dawk li kienu jixluk? Ħadd ma jikkundannak?
Hija qalet: Ħadd, Sinjur. U qalilha Ġesù: Lanqas jien ma nikkundannak: mur, u minn issa tidnibx iżjed.]
Imbagħad Ġesù raġa’ kellimhom, billi qal: Jiena hu d-dawl tad-dinja: min jimxi warajja ma jimxix fid-dlam, imma jkollu d-dawl tal-ħajja.
Il-Fariżej għalhekk qalulu: Int tixhed lilek innifsek; ix-xhieda tiegħek ma tiswiex.
Wieġeb Ġesù, u qalilhom: Għalkemm jiena nixhed lili nnifsi, ix-xhieda tiegħi tiswa: għax naf mnejn ġejt, u fejn sejjer; iżda intom ma tistgħux tgħidu mnejn ġej, u fejn sejjer.
Intom tagħmlu ġudizzju skont il-ġisem; jien ma nagħmel ġudizzju minn ħadd.
U madankollu jekk jien nagħmel ġudizzju, il-ġudizzju tiegħi hu minnu: għax miniex waħdi, imma jien u l-Missier li bagħatni.
Hu miktub ukoll fil-liġi tagħkom, li x-xhieda ta’ tnejn min-nies tiswa.
Jiena hu li nixhed għalilja nnifsi, u l-Missier li bagħatni jixhidli.
Imbagħad qalulu: Fejn hu Missierek? Wieġeb Ġesù: Intom la tafu lili, u lanqas lil Missieri: kieku kontu tafu lili, tafu wkoll lil Missieri.
Dal-kliem qal Ġesù fit-teżorerija, hu u jgħallem fit-tempju: u ħadd ma qabdu; għax kienet għadha ma waslitx is-siegħa tiegħu.
Imbagħad raġa’ Ġesù qalilhom: Jiena mmur, u intom tfittxuni, u fi dnubkom tmutu:
Qalu mbagħad il-Lhud: Jaqaw sa joqtol lilu nnifsu? għax qal: Fejn sejjer jien, intom ma tistgħux tiġu?
U qalilhom: ‘Intom minn hawn isfel; jien minn fuq: intom minn din d-dinja; jien miniex minn din id-dinja’.
Għalhekk għedtilkom, li tmutu fi dnubietkom: għax jekk ma temmnux li jiena hu, tmutu fi dnubietkom.
Imbagħad qalulu: Int min int? U Ġesù qalilhom: Sewwasew dak li għidtilkom mill-bidu.
Għandi ħafna ħwejjeġ xi ngħid, u nagħmel ġudizzju minnkom: iżda min bagħatni hu veru; u dak li smajt minn għandu ngħidu lid-dinja.
Ma fehmux li kien ikellimhom fuq il-Missier.
Imbagħad qalilhom Ġesù: Meta tgħollu lil Bin il-bniedem, imbagħad tagħrfu li jien hu, u li minni nnifsi ma nagħmel xejn; iżda kif għallimni Missieri, jien nitkellem dawn il-ħwej-jeġ.
U dak li bagħatni hu miegħi: il-Missier ma ħallinix waħdi; għax jien nagħmel dejjem dawk il-ħwejjeġ li jogħġbu lilu.
Hu u jgħid dal-kliem, ħafna emmnu fih.
Ġesù mbagħad qal lil dawk il-Lhud li emmnu fih: Jekk iżżommu fil-kelma tiegħi, tkunu tassew dixxipli tiegħi,
U tkunu tafu l-verità, u l-verità teħliskom.
Weġbuh: Nisel Abraham aħna, u qatt ma konna lsiera ta’ ħadd: kif tgħidilna: Tkunu ħielsa?
Weġibhom Ġesù: Tassew, tassew ngħidilkom: Kull min jagħmel id-dnub hu lsir tad-dnub.
U l-ilsir ma jibqax id-dar għal dejjem; iżda l-Iben jibqa’ għal dejjem.
Mela jekk l-Iben jagħmilkom ħielsa, tkunu ħielsa tas-sew.
Jien naf li intom nisel Abraham; imma intom tfittxu li toqtluni, għax il-kelma tiegħi ma sabitx wisa’ fikom.
Jien nitkellem fuq dak li rajt għand Missieri; u intom tagħmlu dak li smajtu mingħand missierkom.
Wiġbuh u qalulu: Missierna hu Abraham. Ġesù qalilhom: Kieku intom ulied Abraham, tagħmlu l-opri ta’ Abraham.
Iżda issa tfittxu li toqtluni, bniedem li qalilkom il-verità, li smajt minn Alla: dan ma għamlux Abraham.
Intom tagħmlu l-opri ta’ missierkom. Imbagħad qalulu: Aħna ma twelidniex mill-fornikazzjoni; aħna Missier wieħed għandna, Alla.
Qalilhom Ġesù: Kieku Alla kien Missierkom, kieku tħobbuni: għax jien mingħand Alla ħriġt u ġejt; lanqas ma ġejt minn rajja, imma hu bagħatni.
Għaliex intom ma tifhmux dak li jien qiegħed ngħid? Għax ma tistgħux tisimgħu kelmti.
Intom ulied missierkom ix-Xitan, u x-xewqat ta’ missierkom tridu tagħmlu. Dak kien qattiel mill-bidu, u ma qagħ-adx fil-verità, għax m’hemmx verità fih. Meta jgħid gidba, jitkellem minnu nnifsu: għax hu giddieb, u missier il-gideb.
U għax jien ngħidilkom il-verità, ma temmnunix.
Min minnkom isibni ħati ta’ xi dnub? U jekk ngħid il-verità, għaliex ma temmnunix?
Min hu minn Alla jisma’ kliem Alla: għalhekk intom ma tisimgħuhomx, għax mintomx minn Alla.
Wieġbu mbagħad il-Lhud, u qalulu: Ma ngħidux aħna l-verità li int Samaritan, u li għandek demonju?
Wieġeb Ġesù: Jien m’għandix demonju: iżda nweġġah lil Missieri, u intom iżżebilħuni.
U jien ma nfittixx il-glorja tiegħi: hemm wieħed li jfittex u jagħmel ġudizzju.
Tassew, tassew, ngħidilkom: Jekk bniedem iħares kel-mti, qatt ma jara l-mewt.
Qalulu mbagħad il-Lhud: Issa nafu li għandek demonju. Abraham miet, u l-profeti; u int tgħid: Jekk wieħed iħares kelmti, ma jduq qatt il-mewt.
Jaqaw int akbar minn missierna Abraham, li miet? U l-profeti mietu; lil min int qiegħed tagħmel lilek innifsek?
Wieġeb Ġesù: Jekk jien infaħħar lili nnifsi, il-foħrija tiegħi ma hi xejn: hu Missieri li jfaħħarni; li intom tgħidu, li hu Alla tagħkom:
Imma intom ma għaraftuhx; iżda jien nafu: u kieku ngħid, li ma nafux, inkun bħalkom giddieb: iżda jien nafu, u nħares kelmtu.
Missierkom Abraham qabeż bil-ferħ għall-ħsieb li kien se jara l-jum tiegħi, u rah u feraħ.
Qalulu mbagħad il-Lhud: Għad lanqas għandek ħamsin sena, u rajt lil Abraham?
Qalilhom Ġesù: Tassew, tassew, ngħidilkom: Qabel ma kien Abraham, jien hu.
Imbagħad qabdu l-ġebel biex jitfgħuh għalih: imma Ġesù staħba, u ħareġ mit-tempju, billi għadda minn nofshom, u hekk baqa’ sejjer.

Ġwanni 9

Hu u għaddej, Ġesù ra raġel agħma minn twelidu.
U d-dixxipli tiegħu staqsewh, billi qalu: Rabbi, min dineb, dar-raġel, jew il-ġenituri tiegħu, biex twieled agħma?
Wieġeb Ġesù: La dar-raġel ma dineb, u lanqas il-ġeni-turi tiegħu: imma biex l-opri ta’ Alla jidhru fih.
Jaħtieġli nagħmel l-opri ta’ dak li bagħatni, sa-kemm idum in-nhar: jiġi l-lejl, meta ħadd ma jista’ jaħdem.
Sa ma nibqa’ fid-dinja, jiena d-dawl tad-dinja.
Wara li tkellem hekk, beżaq fl-art, u għamel it-tajn bil-bżieq, u dilek għajnejn ir-raġel agħma bit-tajn,
U qallu: Mur inħasel fil-menqgħa ta’ Silwah (li tfisser, Mibgħut). Mar, mela, u nħasel, u ġie jara.
Mela l-ġirien, u dawk li qabel kienu jarawh agħma, qalu: Dan mhux dak li kien ikun bil-qiegħda jitlob?
X’uħud qalu: Dan hu. Oħrajn qalu: Jixbħu. Iżda hu qal: Jien hu.
Għalhekk qalulu: Kif kienu miftuħin għajnejk?
Wieġeb u qal: Raġel li jgħidulu Ġesù għamel it-tajn, u dilek għajnejja, u qalli: Mur fil-menqgħa ta’ Silwah, u nħasel: mort u nħsilt, u ħadt id-dawl.
Imbagħad qalulu: Fejn hu dan? Qal: Ma nafx.
U huma ħadu għand il-Fariżej lil dak li qabel kien agħma.
U kien jum is-sabat meta Ġesù għamel it-tajn, u fetaħlu għajnejh.
Imbagħad reġgħu l-Fariżej staqsewh ukoll kif ħa d-dawl. Qalilhom: Qegħidli t-tajn fuq għajnejja, u nħsilt, u issa nara.
Qalu mela x’uħud mill-Fariżej: Dal-bniedem mhux min Alla, għax ma jħarisx is-sabat. Oħrajn qalu: Kif jista’ jkun li bniedem midneb jagħmel mirakli bħal dawn? U kien hemm firda bejniethom.
Reġgħu qalu lill-agħma: Int xi tgħid għal dak li fetaħlek għajnejk? Qal: Hu profeta.
Iżda l-Lhud ma emmnux dak li qal fuqu, li kien agħma, u ħa d-dawl, sakemm sejħu l-ġenituri ta’ dak li kien ħa d-dawl.
U staqsewhom, billi qalu: Hu dan binkom, li intom tgħidu li twieled agħma? Kif issa jara?
Wiġibhom il-ġenituri tiegħu, u qalu: Nafu li dan hu t-tifel tagħna, u li twieled agħma:
Imma issa biex ġie jara, ma nafux; jew min fetaħlu għaj-nejh, ma nafux: għandu żmien: staqsu lilu: jitkellem hu fuq nnifsu.
Qalu dal-kliem il-ġenituri tiegħu, għax kienu jibżgħu mil-Lhud: għax dawn kienu diġa’ ftiehmu, li jekk xi ħadd jagħrfu li kien il-Kristu, jitkeċċa mis-sinagoga.
Għalhekk qalu l-ġenituri tiegħu: Għandu żmien: staqsu lilu.
Imbagħad reġgħu sejħu r-raġel li qabel kien agħma, u qalulu: Faħħar ’l Alla: aħna nafu li dal-bniedem hu midneb.
Wieġeb u qal: Jekk hux midneb jew le, ma nafx: ħaġa waħda naf, illi qabel kont agħma, u issa nara.
Imbagħad reġgħu qalulu: X’għamillek? Kif fetaħlek għajnejk?
Weġibhom: Għidtilkom diġà, u ma smajtux: għaliex tridu terġgħu tisimgħu? Tridu intom ukoll issiru dixxipli tiegħu?
Imbagħad għajruh, u qalu: Int dixxiplu tiegħu; iżda aħna dixxipli ta’ Mosè.
Aħna nafu li Alla kellem lil Mosè: iżda dar-raġel, ma nafux minn fejn hu.
Wieġeb ir-raġel u qalilhom: F’dan qiegħed il-għaġeb, li intom ma tafux minn fejn hu, u madankollu fetaħli għajnejja.
Issa nafu li Alla ma jismax il-midinbin: iżda jekk bniedem iqim lil Alla, u jagħmel ir-rieda tiegħu, lil dan jisimgħu.
Minn żmien l-antik qatt ma nstama’ li xi ħadd fetaħ għajnejn wieħed imwieled agħma.
Kieku dar-raġel ma kienx minn Alla, ma kien jista’ jagħmel xejn.
Wieġbu u qalulu: Int imwieled kollok dnubiet, u trid tgħallimna? U bagħtuh ’il barra.
Sama’ Ġesù li bagħtuh ’il barra; u xħin sabu, qallu: Temmen int f’Bin Alla?
Wieġeb u qal: Min hu, Mulej, biex nemmen fih?
U qallu Ġesù: Inti rajtu; hu dak li qiegħed jitkellem miegħek.
U qal: Mulej, nemmen. U tah qima.
U qal Ġesù: Għall-ġudizzju ġejt f’din id-dinja, biex dawk li ma jarawx, jaraw; u dawk li jaraw, isiru għomja.
U x’uħud mill-Fariżej li kienu miegħu semgħu dal-kliem, u qalulu: Aħna wkoll għomja?
Qalilhom Ġesù: Kieku kontu għomja ma kienx ikollkom ebda dnub: imma issa qegħdin tgħidu: Aħna naraw: għalhekk dnubkom jibqa’.

Ġwanni 10

Tassew, tassew ngħidilkom, min ma jidħolx fil-maqjel tan-nagħaġ mill-bieb imma jaqbeż ġewwa minn naħa oħra, dak hu ħalliel u brigant.
Iżda min jidħol mill-bieb hu r-ragħaj tan-ngħaġ.
Lil dan min ikun mal-bieb jiftaħlu; u ngħaġ jisimgħu leħnu: u jsejjaħ in-ngħaġ tiegħu b’isimhom, u jmexxihom barra.
U meta joħroġ in-ngħaġ tiegħu, imur quddiemhom, u n-ngħaġ jimxi warajh: għax jafu leħnu.
U barrani ma jmorrux warajh, iżda jaħarbu minnu: għax ma jagħrfux leħen il-barranin.
Din it-tixbiha qalilhom Ġesù: iżda huma ma fehmux x’kien qiegħed igħidilhom.
Imbagħad raġa’ qalilhom Ġesù: Tassew, tassew, ngħidi-lkom; Jiena hu l-bieb tan-ngħaġ.
Dawk kollha li ġew qabli huma ħallelin u briganti: iżda n-ngħaġ ma semgħuhomx.
Jiena hu l-bieb; jekk xi ħadd jidħol ġewwa permezz tiegħi, ikun salvat, u jidħol u joħroġ, u jsib il-mergħa.
Il-ħalliel ma jiġix, ħlief biex jisraq, u joqtol, u jeqred: jiena ġejt biex ikollhom il-ħajja, u jkollhom din bl-abbundanza.
Jiena hu r-ragħaj it-tajjeb: ir-ragħaj it-tajjeb jagħti ħajtu għan-ngħaġ tiegħu.
Imma dak li hu mikri, u mhux ir-ragħaj, li n-ngħaġ m’humiex tiegħu, jara l-lupu ġej, u jħalli n-ngħaġ u jaħrab: u l-lupu jaqbadhom, u jxerred in-ngħaġ.
Il-mikri jaħrab, għax hu mikri, u ma jieħux ħsieb in-ngħaġ.
Jiena hu r-ragħaj it-tajjeb, u nagħraf in-ngħaġ tiegħi, u ningħaraf minn dawk li huma tiegħi.
Bħalma l-Missier jagħraf lili, hekk ukoll jien nagħraf il-Missier: u jiena nagħti ħajti għan-ngħaġ.
U għandi ngħaġ oħra, li m’humiex minn dil-merħla: dawn ukoll jaħtieġli niġborhom, u jisimgħu leħni; u jkun hemm merħla waħda, u ragħaj wieħed.
Għalhekk iħobbni Missieri, għax nagħti ħajti, biex narġa’ neħodha.
Ħadd ma jeħodhieli, iżda jiena nagħtiha minni nnifsi. Għandi s-setgħa nagħtiha u għandi s-setgħa narġa’ neħodha. Dan il-kmandament ħadt minn għand Missieri.
Reġgħet mela qamet firda fost il-Lhud minħabba dal-kliem.
U ħafna minnhom qalu: Għandu demonju fih, u hu miġnun; x’intom qegħdin tisimgħuh?
Oħrajn qalu: Dan mhux kliem ta’ min għandu demonju. Jista’ demonju jiftaħ għajnejn il-għomja?
Kienet il-festa tad-dedikazzjoni f’Ġerusalemm, u kienet ix-xitwa.
U Ġesù kien jimxi fit-tempju, fil-portiku ta’ Salamun.
Imbagħad il-Lhud daru miegħu, u qalulu: Kemm sa ddum tħallina bejn ħaltejn: Jekk int il-Kristu, għidilna ċar.
Weġibhom Ġesù: Għidtilkom u ma temmnux: l-għemejjel li nagħmel f’isem Missieri, huma xhieda tiegħi.
Iżda intom ma temmnux, għax mintomx min-ngħaġ tiegħi, bħal ma għidtilkom.
In-ngħaġ tiegħi jisimgħu leħni, u jiena nagħrafhom, u jiġu warajja:
U jiena nagħtihom il-ħajja ta’ dejjem; u ma jintilfu qatt, u lanqas ebda bniedem ma jaħtafhomli minn idi.
Missieri, li tahomli, hu aqwa minn kulħadd; u ħadd ma jista’ jaħtafhom minn id Missieri.
Jiena u Missieri ħaġa waħda aħna.
Imbagħad il-Lhud reġgħu qabdu l-ġebel biex iħaġġruh.
Weġibhom Ġesù: Urejtkom ħafna opri tajba minn Missieri; għal liema opra minnhom tħaġġruni?
Il-Lhud weġbuh, billi qalu: Għal xi opra tajba ma nħaġġrukx: iżda għad-dagħwa; u għax int, bniedem, tagħmel lilek innifsek Alla.
Weġibhom Ġesù: Mhux miktub fil-liġi tagħkom: Jiena għedt: allat intom?
Jekk sejħilhom allat, lil dawk li lilhom ġiet il-kelma ta’ Alla, u l-iskrittura ma tistax tkun imħassra;
Tgħidu lil min il-Missier qaddes, u bagħat fid-dinja: Qiegħed tidgħi; għax għedt: Jiena Bin Alla?
Jekk ma nagħmilx l-opri ta’ Missieri, temmnunix.
Iżda jekk nagħmel, għalkemm ma temmnunix, emmnu l-opri: biex tkunu tafu, u temmnu, li l-Missier fija, u jien fih.
Għalhekk reġgħu riedu jaqbduh: iżda ħarġilhom minn idhom,
U raġa’ mar in-naħa l-oħra tal-Ġordan fil-post fejn Ġwanni qabel kien igħammed; u baqa’ hemm.
U ħafna ġew għandu, u qalu: Ġwanni m’għamel ebda miraklu: iżda dak kollu li Ġwanni qal fuq dal-bniedem kien kollu minnu.
U ħafna hemm emmnu fih.

Ġwanni 11

Issa kien hemm wieħed marid, jismu Lazzru, minn Betanja, mir-raħal ta’ Marija, u ta’ Marta oħtha.
Kienet dik Marija li dilket il-Mulej biż-żejt ifuħ, u mesħitlu riġlejh b’xagħarha, li ħuha Lazzru kien marid.
Mela ż-żewġt aħwa bagħtu jgħidulu: Mulej, ara, min tħobb int marid.
Malli Ġesù sama’ dan, qal: Dil-marda mhix għall-mewt, iżda għall-glorja ta’ Alla, biex l-Iben t’Alla jkun igglorifikat biha.
Issa Ġesù kien iħobb lil Marta, u lil Marija, u lil Lazzru.
Għalhekk kif sama’ li kien marid, baqa’ jumen fl-istess lok fejn kien.
Imbagħad wara dan qal lid-dixxipli tiegħu: Ħa nerġgħu mmorru l-Lhudija.
Id-dixxipli tiegħu qalulu: Rabbi, il-Lhud m’ilhomx riedu jħaġġruk; u trid tarġa’ tmur hemm?
Wieġeb Ġesù: Mhux tnax-il siegħa fih in-nhar? Jekk wieħed jimxi bi nhar, ma jitfixkilx, għax jara d-dawl ta’ did-dinja.
Imma jekk wieħed jimxi bil-lejl, jitfixkel, għax id-dawl ma jkunx fih.
Dawn il-ħwejjeġ qal hu: u wara dan qalilhom: Ħabibna Lazzru rieqed; imma mmur, biex inqajmu mill-irqad.
Qalulu mbagħad id-dixxipli: Mulej, jekk hu rieqed, ifiq.
Iżda Ġesù kien qal għall-mewt tiegħu: iżda huma ħasbu li kien jitkellem fuq l-irqad tan-ngħas.
Imbagħad qalilhom Ġesù bla ħabi: Lazzru miet.
U nifraħ minħabba fikom li ma kontx hemm, biex tem-mnu; imma ħa mmorru ħdejh.
Imbagħad qal Tumas, li jgħidulu Didimu, lil sħabu d-dixxipli: Ħa mmorru aħna wkoll, biex immutu miegħu.
Imbagħad meta ġie Ġesù, sab li kien diġà ilu erbat ijiem fil-qabar.
Issa Betanja kienet qrib Ġerusalemm, madwar ħmistax-il stadju:
U bosta mil-Lhud ġew għand Marta u Marija, biex ifarrġuhom fuq ħuhom.
Imbagħad Marta, hekk kif semgħet li Ġesù kien ġej, marret u ltaqgħet miegħu: iżda Marija qagħdet id-dar.
Imbagħad Marta qalet lil Ġesù: Mulej, li kont hawn, ma mietx ħija.
Imma naf, imqar issa, li kulma titlob lil Alla, Alla jagħtihulek.
Qalilha Ġesù: Ħuk jarġa’ jqum.
Qaltlu Marta: Naf li jqum fil-qawmien fl-aħħar jum.
Qalilha Ġesù: Jien hu l-qawmien u l-ħajja. Kull min jemmen fija, ukoll jekk imut, igħix.
U kull min igħix u jemmen fija ma jmut qatt. Temmen dan?
Qaltlu: Iva, Mulej: jien nemmen li int il-Kristu, Bin Alla, li għandu jiġi fid-dinja.
U wara li qalet dan, marret, u sejħet bil-moħbi lil oħtha Marija, u qaltilha: L-Imgħallem hawn, u qiegħed isejjaħlek.
U malli semgħet dan, qamet malajr, u ġiet għandu.
Issa Ġesù kien għadu ma daħalx ir-raħal, imma kien għadu fejn iltaqgħet miegħu Marija.
Imbagħad il-Lhud li kienu magħha d-dar, u jfarrġuha, malli raw li Marija qamet malajr u ħarġet, marru warajha, u bdew igħidu: Sejra ħdejn il-qabar biex tibki hemm.
Imbagħad xħin ġiet Marija fejn kien Ġesù, u ratu, ixteħtet f’riġlejh, u qaltlu: Mulej, kieku kont hawn, ħija ma mietx.
Mela meta Ġesù raha tibki, u l-Lhud li ġew magħha jibku wkoll, tniegħed l-ispirtu, u kien imqanqal,
U qal: Fejn qegħidtuh? Qalulu: Mulej, ejja ara.
U Ġesù beka.
Imbagħad qalu l-Lhud: Ara, kemm kien iħobbu!
U x’uħud minnhom qalu: Ma satax dal-bniedem, li fetaħ għajnejn l-agħma, jagħmel li wkoll dar-raġel ma jmutx?
Mela Ġesù, hu u jitniegħed fih innifsu, ġie ħdejn il-qabar. Dan kien għar, u ġebla mqiegħda fuqu.
Qal Ġesù: Neħħu l-ġebla. Qaltlu Marta oħt il-mejjet: Mulej, diġà jinten: għax ilu erbat ijiem mejjet.
Qalilha Ġesù: Ma għidtlikx, li, jekk temmen, tara l-glorja ta’ Alla?
Imbagħad neħħew il-ġebla mill-post fejn il-mejjet kien qiegħed. U Ġesù rafa’ għajnejh ’il fuq, u qal: Missier, niżżikħajr talli smajtni.
U jien naf li int dejjem tismagħni: imma minħabba n-nies li hawn madwari għidt dan, biex jemmnu li inti bgħattni.
U meta tkellem hekk, għajjat b’leħen qawwi: Lazzru, oħroġ.
U ħareġ il-mejjet, b’idejh u riġlejh marbuta bil-fsieqi: u wiċċu marbut b’maktur. Qalilhom Ġesù: Ħolluh, u ħalluh imur.
Imbagħad ħafna mil-Lhud li ġew għand Marija, u raw x’kien għamel Ġesù, emmnu fih.
Iżda x’uħud minnhom marru għad il-Fariżej, u qalulhom x’kien għamel Ġesù.
Imbagħad il-qassisin il-kbar u l-Fariżej sejħu l-kunsill, u qalu: X’nagħmlu? għax dal-bniedem qiegħed jagħmel ħafna mirakli?
Jekk inħalluh hekk, kulħadd jemmen fih: u jiġu r-Rumani u jeħdulna sew it-tempju tagħna u kemm lil ġensna.
U wieħed minnhom, jismu Qajfas, li dik is-sena kien il-qassis il-kbir, qalilhom: Intom ma tafu xejn,
Lanqas taħsbu li jaqblilna, illi jmut bniedem wieħed għall-poplu, u ma jinqeridx il-ġens kollu.
Dan ma qalux minnu nnifsu; imma billi kien il-qassis il-kbir f’dik is-sena, ħabbar li Ġesù kellu jmut għal dak il-ġens;
U mhux għal dak il-ġens biss, iżda wkoll biex jiġbor flimkien l-ulied ta’ Alla li kienu mxerrdin.
Imbagħad minn dak in-nhar ftiehmu flimkien li joqtluh.
Għalhekk Ġesù ma baqax jimxi iżjed fid-dieher qalb il-Lhud; iżda mar minn lejn il-kampanja qrib ix-xagħri, f’belt jisimha Efrajm, u baqa’ hemm mad-dixxipli tiegħu.
U l-għid tal-Lhud kien qorob: u ħafna telgħu Ġerusalemm minn dik l-art qabel il-għid, biex jippurifikaw ruħhom.
Imbagħad fittxu ’l Ġesù, u qalu lil xulxin, huma u qegħdin fit-tempju: X’jidrilkom, li ma jiġix għall-festa?
Issa sew il-qassisin il-kbar u kemm il-Fariżej taw ordni, illi jekk xi ħadd ikun jaf fejn hu, igħid, biex jaqbduh.

Ġwanni 12

Imbagħad sitt ijiem qabel il-għid Ġesù ġie Betanja, fejn kien Lazzru li kien miet, u li hu qajjem mill-mewt.
Hejjewlu ikla hemm; u Marta kienet taqdi: iżda Lażżru kien wieħed milli kienu fuq il-mejda miegħu.
Imbagħad ħadet Marija libbra żejt ta’ nard safi, li jiswa wisq, u dilket riġlejn Ġesù, u mesħitlu riġlejh b’xagħrha: u d-dar imtliet bir-riħa taż-żejt.
Imbagħad qal wieħed mid-dixxipli tiegħu, Ġuda Iskarjota, bin Xmun, li kellu jittradih:
Għaliex daż-żejt ma nbiegħx tliet mitt dinier, u ngħataw lill-foqra?
Dan qalu, mhux għax kien jaħseb għall-foqra; iżda għax kien ħalliel, u kellu l-borża, u kien iġorr dak li kienu jirfgħu fiha.
Imbagħad qal Ġesù: Ħalliha: hija kienet refgħetu għal jum id-difna tiegħi.
Għax il-foqra għandkom dejjem magħkom; iżda mhux dejjem għandkom lili.
Mela kotra kbira ta’ Lhud għarfu li kien hemm: u ġew mhux minħabba Ġesù biss, iżda wkoll biex jaraw lil Lazzru, li kien qajmu mill-imwiet.
Iżda l-qassisin il-kbar ftiehmu li joqtlu wkoll lil Lazzru;
Għax minħabba fih ħafna mil-Lhud kienu jitilqu, u jemmnu f’Ġesù.
Il-għada ħafna nies li kienu ġew għall-festa, meta sem-għu li Ġesù kien ġej Ġerusalemm,
Ħadu friegħi tas-siġar tal-palm, u ħarġu jilqgħuh, u għa-jtu: Osanna: Imbierek min ġej f’isem il-Mulej! U s-Sultan ta’ Iżrael!
U Ġesù, meta sab felu, rikeb fuqu; kif inhu miktub:
La tibżax, bint Sijon: ara, is-Sultan tiegħek ġej, riekeb fuq felu ta’ ħmara.
Dawn il-ħwejjeġ ma fehmuhomx għall-ewwel id-dixx-ipli tiegħu: iżda meta Ġesù kien igglorifikat, ftakru mbagħad li dawn il-ħwejjeġ kienu miktubin għalih, u li dawn il-ħwejjeġ kienu għamlulu.
Il-folla mela li kienet miegħu xħin sejja lil Lazzru mill-qabar, u qajmu mill-imwiet, kienet tagħti xhieda.
Minħabba f’hekk in-nies ukoll laqgħuh, għax kienu semgħu lil kien għamel dal-miraklu.
Għalhekk qalu l-Fariżej bejniethom: Taraw kif ma ta-għmlu xejn? Ara, id-dinja marret warajh.
U kien hemm xi Griegi fost dawk li kienu telgħu biex jagħtu qima fil-festa:
Dawn meta resqu lejn Filippu, li kien minn Betsajda tal-Galilija, u talbuh, billi qalu: Sinjur, nixtiequ naraw lil Ġesù.
Ġie Filippu u qal lil Indri: u mbagħad Indri u Filippu qalu lil Ġesù.
U Ġesù wieġeb, billi qal: Waslet is-siegħa, li Bin il-bniedem ikun igglorifikat.
Tassew, tassew, ngħidilkom: Jekk qamħa ma taqax fl-art u tmut, tibqa’ weħidha: iżda jekk tmut, tagħmel ħafna frott.
Min iħobb lil ħajtu jitlifha; u min jobgħod lil ħajtu f’din id-dinja jżommha għall-ħajja ta’ dejjem.
Jekk xi ħadd irid jaqdini, hu għandu jimxi warajja; u fejn inkun jien, hemm ukoll ikun il-qaddej tiegħi. Min jaqdi lili, il-Missier jagħtih ġieh.
Issa ruħi mqallba; u x’naqbad ngħid? Missier, eħlisni minn dis-siegħa: iżda għalhekk jien ġejt għal dis-siegħa.
Missier, igglorifika lil ismek. Imbagħad ġie leħen mis-sema jgħid: U igglorifikajtu, u narġa’ nigglorifikah.
Għalhekk in-nies li kienet hemm, u semgħet dan, qalet li kienet ragħda: oħrajn qalu: Kellmu anġlu.
Wieġeb Ġesù, u qal: Mhux minħabba fija ġie dal-leħen, imma minħabba fikom.
Issa hu l-ġudizzju ta’ did-dinja: issa l-ħakkiem ta’ did-dinja jinxteħet barra.
U jien, jekk nintrefa’ mill-art, niġbed lil kulħadd lejja.
Qalu dan, biex ifisser b’liema mewt kellu jmut.
Wiġbuh in-nies: Aħna smajna mil-liġi li l-Kristu jibqa’ għal dejjem: u int kif tgħid: Bin il-bniedem għandu jintrefa’? Min hu dan Bin il-bniedem?
Imbagħad qalilhom Ġesù: Ftit żmien ieħor id-dawl hu magħkom. Imxu waqt li għandkom id-dawl, biex ma jiġix fuq-kom id-dlam: għax min jimxi fid-dlam ma jafx fejn hu sejjer.
Waqt li għandkom id-dawl, emmnu fid-dawl, biex tkunu wlied id-dawl. Meta Ġesù tkellem dawn il-ħwejjeġ, telaq, u nħeba minnhom.
Iżda għalkemm għamel ħafna mirakli quddiemhom, ma emmnux fih:
Biex isseħħ il-kelma tal-profeta Isaija, li qal: Mulej, min emmen dak li xandarna, u lil min driegħ il-Mulej kien imgħarraf?
Għalhekk ma setgħux jemmnu, għaliex Isaija qal ukoll:
Għamielhom għajnejhom, u webbes qalbhom; biex ma jarawx b’għajnejhom, u lanqas jifhmu b’qalbhom, u jikkonvertu, u jkolli nfejjaqhom.
Dawn il-ħwejjeġ qal Isaija, meta ra l-glorja tiegħu, u tkellem fuqu.
Madankollu ħafna mill-kbarat emmnu fih; iżda minħabba l-Fariżej ma kinux jistqarruh, biex ma jitkeċċewx mis-sinagoga:
Għax ħabbew il-glorja tal-bniedem aktar mill-glorja ta’ Alla.
Għajjat Ġesù, u qal: Min jemmen fija, mhux fija jem-men, iżda f’min bagħtni.
U min jara lili jara lil min bagħatni.
Jien ġejt dawl fid-dinja, biex kull min jemmen fija ma jibqax fid-dlam.
U jekk xi ħadd jisma’ kliemi, u ma jemminx, ma nagħmilx ġudizzju minnu; għax ma ġejtx biex nagħmel ġudizzju mid-dinja, imma biex insalva d-dinja.
Min iwarrabni, u ma jilqax kliemi, għandu wieħed li jagħmel ġudizzju minnu: il-kliem li jiena għidt, dan jagħmel ġudizzju minnu fl-aħħar jum.
Għax jien ma tkellimtx minni nnifsi: iżda l-Missier li bagħatni, hu ordnali x’għandi ngħid, u x’għandi nitkellem.
U naf li l-ordni tiegħu hi l-ħajja ta’ dejjem: għalhekk kulma nitkellem, kif qalli l-Missier, hekk nitkellem jien.

Ġwanni 13

Issa qabel il-festa tal-għid, meta Ġesù kien jaf li waslet is-siegħa tiegħu li għandu jgħaddi minn did-dinja għal għand il-Missier, billi kien ħabb lil tiegħu, li kienu fid-dinja, baqa’ jħobbhom sa l-aħħar.
U matul l-ikla, billi x-Xitan kien diġà daħħal f’qalb Ġuda Iskarjota, bin Xmun, biex jittradih;
Ġesù kif kien jaf li kollox kien tah il-Missier f’idejh, u li mingħand Alla kien ħareġ, u għand Alla kien sejjer;
Qam mill-ikla, qiegħed fil-ġenb ħwejġu; u ħa xugaman, u tħażżem.
Wara dan tafa’ l-ilma fi friskatur, u beda jaħsel riġlejn id-dixxipli, u jimsagħhomlhom bix-xugaman li bih kien imħaż-żem.
Imbagħad wasal għal Xmun Pietru, u Pietru qallu: Mulej, int taħsilli riġlejja?
Wieġeb Ġesù, u qallu: Dak li nagħmel jien int issa ma tafux; iżda tkun tafu wara.
Qallu Pietru: Ma jkun qatt li inti taħsilli saqajja. Jekk ma naħslikx, ma jkollokx sehem miegħi.
Xmun Pietru qallu: Mulej, mhux riġlejja biss, iżda idejja wkoll u rasi.
Qallu Ġesù: Min hu maħsul ma jaħtieġx li jaħsel riġlejh, iżda hu nadif kollu kemm hu: intom indaf, iżda mhux ilkoll.
Għax kien jaf min kellu jittraddih; għalhekk qal: Min-tomx indaf ilkoll.
Għalhekk wara li ħaslilhom saqajhom, hu ħa l-mantar, u raġa’ qagħad mal-mejda, u qalilhom: Tafu x’għamiltilkom?
Intom issejħuli Mgħallem u Mulej; u sewwa tgħidu; għax hekk jien.
Jekk jien mela, il-Mulej u l-Imgħallem tagħkom, u ħsil-tilkom riġlejkom; intom ukoll għandkom taħslu riġlejn xulxin.
Għax jien tajtkom eżempju, biex bħal ma għamiltilkom jien, hekk tagħmlu intom.
Tassew, tassew ngħidilkom: Il-qaddej mhux akbar minn sidu; lanqas min hu mibgħut akbar minn min bagħtu.
Jekk tafu dawn il-ħwejjeġ, henjin intom jekk tagħmlu-hom.
Mhux għalikom ilkoll qiegħed ngħid: jiena naf lil min għażilt: iżda biex isseħħ l-iskrittura: Min jiekol il-ħobż miegħi, rafa’ għalija għarqubu.
Issa ngħidilkom qabel ma jiġri, biex, meta jiġri, temmnu li jiena [hu].
Tassew, tassew, ngħidilkom: Min jilqa’ lil min nibgħat jien, jilqa’ lili; u min jilqa’ lili jilqa’ lil min bagħatni.
Wara li Ġesù qal hekk, tħawwad fl-ispirtu, u xehed, u qal: Tassew, tassew, ngħidilkom, li wieħed minnkom jittradini.
Imbagħad id-dixxipli ħarsu lejn xulxin, billi kienu fid-dubju għal min kien qiegħed jgħid.
Issa kien hemm mixħut fuq ħdan Ġesù wieħed mid-dixxipli tiegħu li Ġesù kien iħobb.
Għemżu mela Xmun Pietru, biex jistaqsih fuq min kien qiegħed jgħid.
Hu u jitmejjel fuq sider Ġesù, dak qallu: Mulej, min hu?
Wieġeb Ġesù: Hu dak, li nagħtih ftieta, wara li nbillha. U wara li bill il-ftieta, taha ’l Ġuda Iskarjota, bin Xmun.
U wara l-ftieta, daħal fih Satana. Imbagħad Ġesù qallu: Dak li għandek tagħmel, agħmlu mill-aktar fis.
Ħadd minn dawk li kienu fuq il-mejda ma kien jaf il-għala qallu dan.
Għax x’uħud minnhom ħasbu, li billi Ġuda kellu l-bor-ża, Ġesù qallu: Ixtri dak li naħtieġu għall-festa; jew, biex jagħti xi ħaġa lill-foqra.
Xħin ħa l-ftieta ħareġ mill-ewwel: u kien il-lejl.
Għalhekk, meta ħareġ, qal Ġesù: Issa hu igglorifikat Bin il-bniedem, u Alla hu igglorifikat fih.
Jekk Alla hu igglorifikat fih, Alla wkoll jigglorifikah fih innifsu, u dalwaqt jigglorifikah.
Uliedi ċ-ċkejknin, ftit ieħor indum magħkom. Għad tfittxuni: u bħal ma għidt lil-Lhud: Fejn sejjer jien, intom ma tistgħux tiġu; hekk ngħid lilkom issa.
Kmandament ġdid nagħtikom: Li tħobbu lil xulxin; bħal ma ħabbejtkom jien, ħobbu intom ukoll lil xulxin.
B’dan jagħraf kulħadd li intom dixxipli tiegħi, jekk għandkom l-imħabba lejn xulxin.
Qallu Xmun Pietru: Mulej, fejn sejjer? Wieġeb Ġesù: Fejn sejjer jien, ma tistax tiġi warajja għalissa; iżda tiġi warajja mbagħad.
Qallu Pietru: Mulej, għala ma nistax niġi warajk issa? Nagħti ħajti għalik.
Wieġbu Ġesù: Tagħti ħajtek għalija? Tassew, tassew, ngħidlek: Ma jiddinx is-serduq, sa ma tiċħadni tliet darbiet.

Ġwanni 14

La tħallux qalbkom titħawwad: emmnu f’Alla, emmnu wkoll fija.
F’dar Missieri hemm ħafna postijiet: kieku ma kienx hekk, kont ngħidilkom. Jien sejjer inhejji post għalikom.
U jekk immur u nhejji post għalikom, nerġa’ niġi u nilqagħkom għandi; biex fejn inkun jien, tkunu intom ukoll.
U fejn sejjer jien tafu, u tafu t-triq.
Qallu Tumas: Mulej, ma nafux fejn sejjer; u kif nistgħu nafu t-triq.
Qallu Ġesù: Jiena hu t-triq, u l-Verità, u l-ħajja: Ħadd ma jiġi għand il-Missier, ħlief bija.
Kieku għaraftuni, kontu tagħrfu ’l Missier ukoll; minn issa tagħrfuh, u rajtuh.
Qallu Filippu: Mulej, urina ’l Missier, u biżżejjed għalina.
Qallu Ġesù: Ilni daż-żmien kollu magħkom, u għadek ma tafnix, Filippu? Min ra lili ra ’l Missier; u kif tgħid int mela: Urina ’l Missier?
Ma temminx li jien fil-Missier, u l-Missier fija? Il-kliem li ngħidilkom ma ngħidux minni nnifsi: iżda l-Missier li jgħam-mar fija, hu jagħmel l-opri.
Emmnuni li jien fil-Missier, u l-Missier fija, jew għall-inqas emmnuni minħabba l-opri nfushom.
Tassew, tassew, ngħidilkom: Min jemmen fija, l-għemejjel li nagħmel jien jagħmel hu wkoll; u opri akbar minn dawn jagħmel; għax jien sejjer għand Missieri.
U kulma titolbu f’ismi, dak nagħmel, biex il-Missier ikun igglorifikat fl-Iben.
Jekk titolbuni xi ħaġa f’ismi, nagħmilha.
Jekk tħobbuni, intom iżżommu l-kmandamenti tiegħi.
U jien nitlob lill-Missier, u hu jagħtikom Avukat ieħor, biex jibqa’ magħkom għal dejjem;
Li hu l-Ispirtu tal-verità, li d-dinja ma tistax tilqgħu, għax la tarah, u lanqas tafu: iżda intom tafuh; għax igħammar magħkom, u jkun fikom.
Ma nħallikomx iltiema: niġi għandkom.
Ftit ieħor, u d-dinja ma taranix aktar; iżda intom taraw-ni: billi jiena ngħix, intom tgħixu wkoll.
Dak in-nhar intom tagħrfu li jiena f’Missieri, u intom fija, u jiena fikom.
Min għandu l-kmandamenti tiegħi u jħarishom, dak hu li jħobbni, u min iħobb lili, iħobbu wkoll il-Missier, u jiena wkoll inħobbu u nurih lili nnifsi.
Qallu Ġuda, mhux l-Iskarjota: Mulej, kif kien li sejjer turi ruħek lilna, u mhux lid-dinja?
Ġesù wieġbu: Jekk xi ħadd iħobbni, iħares kelmti, u Missieri jħobbu, u aħna niġu u ngħammru għandu.
Min ma jħobbnix ma jħarisx kliemi. U l-kelma li tisimgħu, mhix tiegħi, iżda tal-Missier li bagħatni.
Dawn għidtilkom, billi għadni magħkom.
Imma L-Avukat, li hu l-Ispirtu Qaddis, li l-Missier jibgħat f’ismi, hu jgħallimkom kollox, u jfakkarkom kulma għidtilkom.
Inħallilkom il-paċi, nagħtikom il-paċi tiegħi: mhux bħal ma tagħti d-dinja, nagħtikom jien: la tħallux qalbkom titħawwad, lanqas tħalluha titbażża’.
Smajtu x’għidtilkom: Sejjer, u narġa’ niġi għandkom. Kieku ħabbejtuni, kontu tifirħu, għax għidt: Sejjer għand Missieri: għax Missieri akbar minni.
U għidtilkom issa qabel ma jiġri; biex, meta jiġri, tem-mnu.
Minn issa ma nitkellimx aktar magħkom, għax ġej il-ħakkiem ta’ did-dinja, u fija m’għandu xejn.
Iżda biex id-dinja tagħraf li jiena nħobb il-Missier u bħal ma ordnali l-Missier, hekk nagħmel. Qumu, nitilqu minn hawn.

Ġwanni 15

1Jiena d-dielja vera, u Missieri l-bidwi.
Kull fergħa fija li ma tagħmilx frott ineħħiha: u kull fergħa li tagħmel il-frott, jiżborha, biex tagħmel frott aktar.
Intom issa ndaf minħabba l-kelma li kellimtkom.
Ibqgħu fija, u jiena nibqa’ fikom. Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibqgħux fija.
Jiena d-dielja, intom il-friegħi: Min jibqa’ fija, u jiena fih, dan jagħmel ħafna frott: għax mingħajri ma tistgħu tagħmlu xejn.
Jekk wieħed ma jibqax fija, jintrema barra bħal fergħa, u jinxef; u friegħi bħal dawn jiġbruhom, u jixħtuhom fin-nar, u jinħarqu.
Jekk tibqgħu fija u kliemi jibqa’ fikom, itolbu kull ma tridu, u jingħatalkom.
Din hi l-glorja ta’ Missieri, li intom tagħmlu ħafna frott u tkunu dixxipli tiegħi.
Bħal ma ħabbni l-Missier, hekk ħabbejtkom jiena: ibqgħu fl-imħabba tiegħi.
Jekk tħarsu l-kmandamenti tiegħi, intom tibqgħu fi mħabbti, kif jiena ħarist il-kmandamenti ta’ Missieri u qiegħed f’imħabbtu.
Għidtilkom dawn il-ħwejjeġ, biex il-ferħ tiegħi jibqa’ fikom, u biex il-ferħ tagħkom ikun sħiħ.
Dan hu l-kmandament tiegħi: Li tħobbu lil xulxin, bħal ma ħabbejtkom jiena.
Imħabba akbar minn din ħadd ma għandu, li wieħed jagħti ħajtu għal ħbiebu.
Intom ħbiebi, jekk tagħmlu dak kollu li jiena nikkmandakom.
Ma ngħidilkomx aktar qaddejja: għax il-qaddej ma jafx x’jagħmel sidu: iżda sejjaħtilkom ħbieb; għax kulma smajt min-għand Missieri għarrafthulkom.
Mhux intom ħtartuni, iżda jien ħtartkom, u jien għamiltkom, biex tmorru u tagħmlu l-frott, u li l-frott tagħkom jibqa’: biex kulma titolbu ’l Missieri f’ismi, jagħtihulkom.
Dan nikkmandakom: li tħobbu lil xulxin.
Jekk id-dinja tobgħodkom, tafu li lili bagħditni qabel bagħditkom.
Li kontu tad-dinja, id-dinja kienet tħobb lil tagħha: iżda billi mintomx tad-dinja, iżda għażiltkom mid-dinja, għalhekk tobgħodkom id-dinja.
Ftakru fil-kelma li għidtilkom: Il-qaddej mhux akbar minn sidu. Jekk ippersegwitawni, jippersegwitaw lilkom ukoll; jekk ħarsu kelmti, iħarsu tagħkom ukoll.
Iżda dan kollu għad jagħmlulkom minħabba ismi, għax ma jafux lil min bagħatni.
Kieku ma ġejtx u kellimthom, ma kienx ikollhom dnub; iżda issa m’għandhom ebda skuża għad-dnub tagħhom.
Min jobgħod lili jobgħod lil Missieri wkoll.
Kieku ma għamiltx fosthom l-opri li ħadd qatt ma għamel, ma kienx ikollhom dnub: iżda issa rawhom, u bagħdu sew lili u kemm lil Missieri.
Iżda dan ġara, biex iseħħ il-kliem miktub fil-liġi tagħ-hom: Bagħduni għal xejn.
Imma meta jiġi l-Avukat, li jiena nibgħatilkom minn għand il-Missier, l-Ispirtu tal-verità, li ġej mill-Missier, hu jixhed għalija:
U intom ukoll tixhdu, għax intom kontu miegħi mill-bidu.

Ġwanni 16

Għidtilkom dawn il-ħwejjeġ, biex ma titfixklux.
Ikeċċukom mis-sinagogi: iva, jasal il-waqt, li kull min joqtolkom jaħseb li qiegħed jaqdi lil Alla.
U dawn il-ħwejjeġ jagħmlulkom, għax ma jafux u la ’l Missier, u lanqas lili.
Iżda dawn il-ħwejjeġ għidtilkom, biex meta jasal il-waqt, tiftakru li jiena għidthomlkom. U dawn il-ħwejjeġ ma għidthomlkomx mill-ewwel, għax kont magħkom.
Iżda issa sejjer għand min bagħatni, u ħadd minkom ma jistaqsini: Fejn sejjer?
Iżda għax għidtilkom dawn il-ħwejjeġ, is-swied il-qalb imlielkom qalbkom.
Madankollu jien ngħidilkom il-verità: Jaqblilkom li jien immur: għax jekk ma mmurx, l-Avukat ma jiġix għandkom; iżda jekk immur, nibgħatulkom.
U meta jiġi hu, jwiddeb lid-dinja dwar id-dnub, u dwar il-ġustizzja, u dwar il-ġudizzju.
Għad-dnub, għax ma emmnux fija;
Għall-ġustizzja, għax sejjer għand Missieri, u ma taraw-nix iżjed;
Għall-ġudizzju, għax il-ħakkiem ta’ did-dinja hu ikkundannat.
Għad għandi bosta ħwejjeġ x’ingħidilkom, iżda issa ma tistgħux tifhmuhom.
Imma meta jiġi, l-Ispirtu tal-verità, hu jiggwidakom għall-verità kollha: għax hu ma jitkellimx minnu nnifsu; iżda dak kollu li jisma’, dak igħid hu: u jħabbrilkom x’għandu jiġi.
Hu jigglorifikani: għax jieħu minn tiegħi, u jgħarrafhulkom.
Kulma għandu l-Missier hu tiegħi. Għalhekk għidt: Jieħu minn tiegħi, u jgħarrafhulkom.
Ftit ieħor, u ma tarawnix iżjed: u tarġa’ ftit ieħor, u tarawni, għax sejjer għand il-Missier.
Imbagħad qalu x’uħud mid-dixxipli tiegħu bejniethom: X’inhu dan li qiegħed igħidilna: Ftit ieħor, u ma tarawnix iżjed: u tarġa’ ftit ieħor, u tarawni: u, Għaliex jien sejjer għand il-Missier?
Għalhekk mela qalu: X’inhu dan li qiegħed igħid: Ftit ieħor? Ma nistgħux ngħidu x’inhu jgħid.
Issa Ġesù għaraf li xtaqu jistaqsuh, u qalilhom: Qegħdin tistaqsu bejnietkom fuq dak li għidt: Ftit ieħor, ma tarawnix: u tarġa’ ftit ieħor, u tarawni?
Tassew, tassew, ngħidilkom: Intom għad tibku u tolfqu; iżda d-dinja tifraħ: u intom titnikktu, iżda n-niket tagħkom jin-bidel f’ferħ.
Mara hi u tiled tkun imnikkta, għax tkun waslet is-siegħa tagħha; imma hekk kif tiled it-tarbija, ma tiftakarx iżjed fl-uġigħ, bil-ferħ li twieled bniedem fid-dinja.
U għalhekk intom issa mnikktin: iżda għad narġa’ narakom, u qalbkom tifraħ, u l-ferħ tagħkom ħadd ma jeħodulkom.
U dak in-nhar xejn ma tistaqsuni. Tassew, tassew, ngħidilkom: Kulma titolbu ’l Missier f’ismi, jagħtihulkom.
S’issa għadkom ma tlabtu xejn f’ismi: itolbu, u taqilgħu, biex il-ferħ tagħkom ikun sħiħ.
Dawn il-ħwejjeġ għidtilkom bit-tixbihat: jiġi ż-żmien meta ma nkellimkomx iżjed bit-tixbihat, iżda ngħarrafkom fuq il-Missier bid-dieher.
U dak in-nhar titolbu f’ismi: u ma ngħidilkomx, li nitlob lill-Missier għalikom:
Għaliex il-Missier innifsu jħobbkom, għax intom ħab-bejtuni, u emmintu li jien ħriġt mingħand Alla.
Ħriġt mingħand il-Missier, u ġejt fid-dinja; narġa’ nħalli d-dinja, u mmur għand il-Missier.
Id-dixxipli tiegħu qalulu: Ara, issa qiegħed titkellem ċar, u ma tgħid ebda qawl.
Issa nafu li taf kollox, u ma taħtieġx li wieħed jistaqsik: għalhekk nemmnu li ħriġt mingħand Alla.
Weġibhom Ġesù: Temmnu issa?
Ara, is-siegħa waslet: iva, issa ġiet, li tixterdu, kull wieħed għal rasu, u lili tħalluni waħdi; imma miniex waħdi, għax il-Missier hu miegħi.
Dawn il-ħwejjeġ għidtilkom biex ikollkom is-sliem bija. Fid-dinja jkollkom tribulazzjoni: iżda qawwu qalbkom; jien għelibt lid-dinja.

Ġwanni 17

Dan il-kliem tkellem Ġesù, u rafa’ għajnejh lejn is-sema, u qal: Missier, waslet is-siegħa, igglorifika ’l Ibnek, biex Ibnek jigglorifikak ukoll:
Bħal ma tajtu l-awtorità fuq kull bniedem, biex jagħti l-ħajja ta’ dejjem lil dawk kollha li tajtu.
U din hi l-ħajja ta’ dejjem, li jagħrfu lilek waħdek veru Alla, u ’l Ġesù Kristu, li inti bgħatt.
Jien igglorifikajtek fuq l-art; temmejt ix-xogħol li tajtni biex nagħmel.
U issa, o Missier, igglorifikani int bik innifsek stess, bil-glorja li kelli miegħek qabel ma kienet id-dinja.
Urejt ismek lill-bnedmin li tajtni mid-dinja: tiegħek kienu, u inti tajthomli, u huma ħarsu l-kelma tiegħek.
Issa għarfu li kulma tajnti hu minn għandek.
Għaliex il-kelmiet li tajtni tajthomlhom; u huma laqgħuhom, u għarfu tassew illi jiena ħriġt minnek, u emmnu li inti bgħattni.
Jien għalihom nitlob; ma nitlobx għad-dinja; iżda għal dawk li tajtni; għax huma tiegħek.
U kulma hu tiegħi, tiegħek; u tiegħek, tiegħi; u jien igglorifikat fihom.
U issa m’għadnix aktar fid-dinja, iżda huma għadhom fid-dinja, u jiena ġej għandek. Missier Qaddis, ħarishom f’ism-ek dawk li inti tajtni, biex ikunu ħaġa waħda bħalna.
Meta kont magħhom fid-dinja ħaristhom f’ismek: dawk li tajtni ħaristhom, u ħadd minnhom ma ntilef, ħlief bin it-telfien; biex isseħħ l-iskrittura.
U issa ġej għandek; u dawn il-ħwejjeġ ngħid fid-dinja, biex ikollhom fihom infushom mitmum il-ferħ tiegħi.
Jien tajthom il-kelma tiegħek; u d-dinja bagħadithom, għax mhumiex tad-dinja, bħalma jien ukoll miniex tad-dinja.
Ma nitlobx li tneħħihom mid-dinja, iżda biex tħarishom mill-ħażen.
Mhumiex tad-dinja, kif jien ukoll miniex tad-dinja.
Qaddishom fil-verità tiegħek: il-kelma tiegħek hi l-verità.
Kif int bgħattni fid-dinja, hekk jien bgħatthom fid-dinja.
U għalihom jien inqaddes lili nnifsi, biex huma wkoll jitqaddsu fil-verità.
Iżda mhux biss għalihom nitlob, iżda wkoll għal dawk li jemmnu fija minħabba kelmithom;
Biex ikunu lkoll ħaġa waħda; bħalma int, Missier, fija, u jiena fik, biex huma wkoll ikunu fina ħaġa waħda: biex id-dinja temmen illi int bgħattni.
U l-glorja li tajtni tajthielhom; biex ikunu ħaġa waħda, bħalma aħna wkoll ħaġa waħda:
Jiena fihom, u inti fija; biex ikunu pperfezzjonati f’ħaġa waħda; u biex tagħraf id-dinja li inti bgħattni, u ħabbejthom, bħal ma ħabbejt lili.
Missier, irrid illi dawk ukoll, li inti tajtni, ikunu miegħi fejn inkun jien; biex jaraw il-glorja tiegħi, li inti tajtni: għax ħabbejnti qabel tisjis id-dinja.
O Missier ġust, id-dinja ma għarfitikx; iżda jien għara-ftek, u dawn għarfu li inti bgħattni.
U għarrafthom ismek, u nibqa’ ngħarrfu: biex l-imħabba li biha ħabbejtni tkun fihom, u jiena fihom.

Ġwanni 18

Wara li qal dal-kliem, Ġesù ħareġ mad-dixxipli tiegħu għan-naħa l-oħra ta’ wied Kedron, fejn kien hemm ġnien, li fih daħal hu, u d-dixxipli tiegħu.
Ġuda wkoll, li ttradih, kien jaf il-post: għax Ġesù kien imur ta’ spiss hemm mad-dixxipli tiegħu.
Għalhekk Ġuda, wara li ħa qatgħa suldati u għases mingħand il-qassisin il-kbar u l-Fariżej, ġie hemm bil-fanali, u t-torċi, u l-armi.
Mela Ġesù, billi kien jaf dak kollu li kellu jiġi fuqu, ħareġ, u qalilhom: Lil min qegħdin tfittxu?
Wiġbuh: Lil Ġesù ta’ Nażaret. Qalilhom Ġesù: Jiena [hu]. U Ġuda wkoll, li ittradih, kien magħhom.
Mela malli qalilhom: Jiena [hu]; marru lura, u waqgħu ma’ l-art.
Imbagħad raġa’ staqsiehom: Lil min qegħdin tfittxu? U huma qalu: Lil Ġesù ta’ Nażaret.
Wieġeb Ġesù: Għidtilkom li jiena [hu]: jekk mela qegħdin tfittxu lili, ħallu lil dawn imorru:
Biex iseħħ il-kliem, li qal: Minn dawk li tajtni, ma tlift lil ħadd.
Imbagħad Xmun Pietru li kellu xabla silitha, u darab il-qaddej tal-qassis il-kbir, u qatagħlu widintu l-leminija. L-isem tal-qaddej kien Malku.
Imbagħad qal Ġesù lil Pietru: Daħħal ix-xabla fil-għant: il-kalċi li tani Missieri ma nixorbux?
Imbagħad il-qatgħa tas-suldati u l-kaptan u l-għases tal-Lhud ħadu lil Ġesù, u rabtuh.
U ħaduh għand Anna l-ewwel; għax kien ħaten Qajfas, li kien il-qassis il-kbir ta’ dik is-sena.
Issa Qajfas kien dak li ta parir lil-Lhud, li kien jaqbel li bniedem wieħed imut għall-poplu.
U Xmun Pietru mar wara Ġesù; u hekk għamel dixxiplu ieħor: dan id-dixxiplu kien magħruf mill-qassis il-kbir, u daħal ma’ Ġesù fil-palazz tal-qassis il-kbir.
Iżda Pietru baqa’ barra fil-bieb. Imbagħad ħareġ dak id-dixxiplu l-ieħor, li kien magħruf mill-qassis il-kbir, u kellem lill-qaddejja tal-bieb, u daħħal lil Pietru.
Imbagħad qalet il-qaddejja tal-bieb lil Pietru: Jaqaw inti wkoll wieħed mid-dixxipli ta’ dal-bniedem? Qal: Miniex.
U l-qaddejja u l-għases kienu hemm bil-wieqfa, billi kienu qabbdu nar tal-faħam; għax kien il-ksieħ; u kienu jissaħħnu: u Pietru kien bil-wieqfa magħhom, u jissaħħan.
Imbagħad il-qassis il-kbir, staqsa lil Ġesù fuq id-dixxipli tiegħu.
Wieġbu Ġesù: Jien kellimt lid-dinja bid-dieher; jien dejjem għallimt fis-sinagoga, u fit-tempju, fejn jinġabru dejjem il-Lhud; u xejn ma tkellimt bil-moħbi.
Għaliex tistaqsini? Staqsi lil dawk li semgħuni, fuqiex kellimthom: ara, huma jafu x’għidt jien.
U malli qal hekk, wieħed mill-għases li kien hemm ta daqqa ta’ ħarta ’l Ġesù, u qal: Hekk twieġeb lill-qassis il-kbir?
Wieġbu Ġesù: Jekk ħażin tkellimt, agħti xhieda tal-ħażen: iżda jekk tajjeb, għaliex issawwatni?
Issa Anna kien bagħtu marbut għand Qajfas il-qassis il-kbir.
U Xmun Pietru kien bil-wieqfa jissaħħan. Mela qalulu: Int mintix ukoll wieħed mid-dixxipli tiegħu? Ċaħad, u qal: Miniex.
Qal wieħed mill-qaddejja tal-qassis il-kbir, lil kien qarib ta’ dak li Pietru qatagħlu widintu: Ma rajtikx jien fil-ġnien miegħu?
Imbagħad raġa’ ċaħad Pietru; u minnufih is-serduq idden.
Imbagħad ħadu lil Ġesù mingħand Qajfas għall-pretorju: u kien kmieni filgħodu: u huma ma daħlux fil-pretorju, biex ma jit-niġġsux; iżda biex ikunu jistgħu jieklu l-għid.
Pilatu mbagħad ħareġ barra fejnhon, u qal: Liema akkuża ġġibu kontra dal-bniedem?
Wieġbu, u qalulu: Kieku ma kienx raġel ta’ ħsara, ma konniex nagħtuh f’idejk.
Qalilhom imbagħad Pilatu: Ħuduh intom, u għamlu ġudizzju minnu skont il-liġi tagħkom. Il-Lhud mela qalulu: Aħna ma nistgħux skont il-liġi noqtlu lil ħadd.
Biex iseħħ il-kliem ta’ Ġesù, li qal, biex juri b’liema mewta kellu jmut.
Imbagħad Pilatu raġa’ daħal fil-pretorju, u sejjaħ lil Ġesù, u qallu: Int is-sultan tal-Lhud?
Wieġbu Ġesù: Qiegħed tgħid dan minnek innifsek, jew oħrajn qaluhulek fuqi?
Wieġeb Pilatu: Mela jiena Lhudi? Ġensek stess u l-qassisin il-kbar tawk f’idejja: x’għamilt?
Wieġeb Ġesù: Is-saltna tiegħi m’hijiex ta’ din id-dinja. Li kieku s-saltna tiegħi kienet ta’ din id-dinja, l-għases tiegħi kienu jiġġieldu biex ma ningħatax f’idejn il-Lhud; imma tabilħaqq is-saltna tiegħi m’hijiex minn hawn.
Pilatu qallu: Mela int sultan? U Ġesù wieġeb: Qiegħed tgħidu int: jien sultan. Jien għalhekk twelidt, u għalhekk ġejt fid-dinja, biex nixhed għall-verità. U kull min iħobb il-verità jisma’ leħni.
Qallu Pilatu: X’inhi l-verità? Wara li qal dan, raġa’ ħareġ fejn il-Lhud, u qalilhom: Jien ma nsib ebda ħtija fih.
Imma intom għandkom drawwa, li jiena neħilsilkom wieħed fil-għid: tridu mela li neħilsilkom is-Sultan tal-Lhud?
Imbagħad ilkoll reġgħu għajtu, billi qalu: Mhux lil dar-raġel, imma ’l Barabba. Issa Barabba kien ħalliel.

Ġwanni 19

Imbagħad mela Pilatu ħa lil Ġesù, u sawtu.
U s-suldati dafru kuruna tax-xewk, u qegħduha fuq rasu, u libbsuh libsa tal-porpra.
U qalu: Is-sliem, Sultan tal-Lhud! U tawh bil-ħarta.
Pilatu raġa’ ħareġ barra, u qalilhom: Ara, nġibulkom barra, biex tkunu tafu li ma nsib ebda ħtija fih.
Ħareġ imbagħad Ġesù, liebes il-kuruna tax-xewk, u l-libsa tal-porpra. U Pilatu qalilhom: Araw il-bniedem!
Xħin mela l-qassisin il-kbar u l-għases rawh, għajtu, billi qalu: Sallbu, sallbu. Pilatu qalilhom: Ħuduh, u sallbuh: għax jien fih ma nsib ebda ħtija.
Wiġbuh il-Lhud: Aħna għandna liġi, u skont il-liġi għandu jmut, għax għamel lilu nnifsu Bin Alla.
Meta mela Pilatu sama’ dal-kliem, aktar baża’.
U raġa’ daħal fil-pretorju, u qal lil Ġesù: Minn fejn int? Imma Ġesù ma tahx tweġiba.
Qallu mbagħad Pilatu: Ma tkellimnix? Ma tafx li jien għandi l-awtorità li nsallbek, u l-awtorità li nitilqek?
Wieġeb Ġesù: Ma kien ikollok ebda awtorità fuqi, li ma kienx mogħti lilek minn fuq: għalhekk min tani f’idejk għandu dnub akbar.
U minn dak il-ħin Pilatu fittex biex jeħilsu: imma l-Lhud għajtu, billi qalu: Jekk teħles lil dar-raġel, mintix ħabib ta’ Ċesri: kull min jagħmel lilu nnifsu sultan jitkellem kontra Ċesri.
Mela meta Pilatu sama’ dal-kliem, ġieb barra lil Ġesù, u qagħad fuq it-tribunal f’lok li jgħidulu ċ-Ċangar, imma bil-Lhudi, Gabbatha.
U kien nhar it-thejjija tal-għid, u madwar is-sitt siegħa: u qal lil-Lhud: Araw is-Sultan tagħkom!
Imma huma għajtu: Neħħih, neħħih, sallbu. Qalilhom Pilatu: Insallab is-sultan tagħkom? Wiġbuh il-qassisin il-kbar: M’għandniex sultan ħlief lil Ċesri.
Imbagħad mela tahulhom f’idejhom biex ikun imsallab. U ħadu lil Ġesù, u marru bih.
U hu, imgħobbi bis-salib tiegħu, ħareġ lejn post igħidu-lu l-Qorriegħa, bil-Lhudi Golgota,
Fejn sallbuh, u miegħu tnejn oħra, wieħed kull naħa, u Ġesù fin-nofs.
U kiteb Pilatu titlu, u qiegħdu fuq is-salib. U t-tiltu kien: Ġesù ta’ Nażaret, sultan tal-Lhud.
Mela ħafna mil-Lhud imbagħad qraw dat-titlu: għax il-post fejn kien imsallab Ġesù kien qrib il-belt, u kien miktub bil-Lhudi, u bil-Grieg, u bil-Latin.
Imbagħad il-qassisin il-kbar tal-Lhud qalu lil Pilatu: La tiktibx: sultan tal-Lhud; imma li hu qal: Jiena Sultan tal-Lhud.
Wieġeb Pilatu: Li ktibt, ktibt.
Imbagħad is-suldati, wara li sallbu ’l Ġesù, ħadu lbiesu, u għamlu erba’ ishma, sehem għal kull suldat; u t-tunika tiegħu wkoll: issa t-tunika kienet bla ħjata, minsuġa minn fuq s’isfel.
Għalhekk qalu bejniethom: Ma nċartuhiex, iżda nitfgħu x-xorti fuqha, lil min tmiss; biex isseħħ l-iskrittura, li tgħid: Qasmu ħwejġi bejniethom, u fuq libsti tefgħu x-xorti. Dan mela għamlu s-suldati.
Issa ħdejn is-salib ta’ Ġesù kien hemm ommu, u oħt ommu, Marija mart Kleopa, u Marija Maddalena.
Mela xħin Ġesù ra lil ommu, u d-dixxiplu li kien iħobb wieqaf hemm, qal lil ommu: Mara, ara ibnek!
Imbagħad qal lid-dixxiplu: Ara ommok! U minn dik is-siegħa d-dixxiplu ħadha għandu.
Wara dan, billi kien jaf Ġesù li kollox issa kien mitmum, biex isseħħ l-iskrittura, qal: Għandi l-għatx.
Issa kien hemm reċipjent mimli bil-ħall: u mlew sponża bil-ħall, u qegħduha fuq qasba taż-żuf, u ressquhielu lejn fommu.
Kif Ġesù ħa l-ħall, qal: Hu mitmum! Imbagħad mejjel rasu u radd ruħu.
Għalhekk il-Lhud, billi kienet it-Thejjija, biex l-iġsma ma jibqgħux fuq is-salib fis-sabat, (għax dak is-sabat kien jum kbir), talbu lil Pilatu biex jitkissru saqajhom, u biex jitneħħew.
Imbagħad ġew is-suldati, u kissru saqajn l-ewwel wieħed, u tal-ieħor li kien imsallab miegħu.
Iżda meta ġew għal Ġesù, u raw li kien diġa’ miet, ma kissrux saqajh:
Iżda wieħed mis-suldati nifidlu ġenbu bil-lanza, u minnufih ħareġ demm u ilma.
U dak li ra dan xehed, u x-xhieda tiegħu hija minnha: u hu jaf li qiegħed igħid il-verità, biex intom temmnu.
Għax dawn il-ħwejjeġ ġraw, biex isseħħ l-iskrittura: Għadma minnu ma tinkisirx.
U skrittura oħra tgħid ukoll: Iħarsu lejn dak li nifdu.
U wara dan Ġużeppi minn Arimateja, billi kien dixxiplu ta’ Ġesù, iżda bil-moħbi minħabba fil-biża’ tal-Lhud, talab lil Pilatu biex ineħħi l-ġisem ta’ Ġesù: u Pilatu ħallieh. Għalhekk ġie, u ħa l-ġisem ta’ Ġesù.
U ġie wkoll Nikodemu, li kien mar bil-lejl l-ewwel darba għand Ġesù, u ġieb taħlita ta’ morr u sabbara, madwar mitt libbra.
Ħadu mbagħad il-ġisem ta’ Ġesù, u kebbuh bi bċejjeċ tal-għażel bil-ħwawar, kif inhi d-drawwa tal-Lhud biex jidfnu.
Issa fil-post fejn kien imsallab kien hemm ġnien; u fil-ġnien qabar ġdid, li ħadd qatt ma kien għadu tqiegħed fih.
Hemm mela qiegħdu ’l Ġesù minħabba l-jum tat-thejjija tal-Lhud; għax il-qabar kien fil-qrib.

Ġwanni 20

Issa, fl-ewwel jum tal-ġimgħa Marija Maddalena ġiet kmieni, meta kien għadu d-dlam, fejn il-qbar, u rat il-ġebla mneħħija mill-qabar.
Imbagħad marret tiġri, u ġiet għand Xmun Pietru, u għand id-dixxiplu l-ieħor, li Ġesù kien iħobb, u qaltilhom: Ħadu l-Mulej mill-qabar, u ma nafux fejn qegħduh.
Mela ħareġ Pietru, u dak id-dixxiplu l-ieħor, u ġew fejn il-qabar.
U bdew jiġru t-tnejn flimkien: u d-dixxiplu l-ieħor għaddieh lil Pietru, u wasal l-ewwel ħdejn il-qabar.
U hu u jitmejjel, u jħares ġewwa, ra l-bċejjeċ tal-għażel mixħutin; imma ma daħalx.
Imbagħad wasal Xmun Pietru li kien warajh, u daħal fil-qabar, u ra l-bċejjeċ tal-għażel mixħutin,
U l-maktur, li kien fuq rasu, mhux qiegħed mal-bċejjeċ tal-għażel, iżda mkebbeb f’ġenb għalih.
Imbagħad daħal id-dixxiplu l-ieħor ukoll, li laħaq l-ewwel ħdejn il-qabar, u ra, u emmen.
Għax kienu għadhom ma jafux l-iskrittura, li kellu jqum mill-imwiet.
Imbagħad id-dixxipli reġgħu marru lejn darhom.
Iżda Marija qagħdet barra mill-qabar tibki: u hija u tibki, tmejlet, u ħarset fil-qabar.
U rat żewġ anġli lebsin abjad bil-qiegħda, il-wieħed fir-ras, u l-ieħor fir-riġlejn, fejn kien qiegħed il-ġisem ta’ Ġesù.
U qalulha: Mara, għax qiegħda tibki? Qaltilhom: Għax ħadu lil Sidi, u ma nafx fejn qegħduh.
U meta qalet hekk, daret lura, u rat lil Ġesù wieqaf, u ma kenitx taf li kien Ġesù.
Qalilha Ġesù: Mara, għalfejn qiegħda tibki? Lil min qiegħda tfittex? Billi ħasbet li kien il-ġardinar, qaltlu: Sinjur, jekk int ġarrejtu minn hawn, għidli fejn qegħidtu, u jiena nieħdu.
Qalilha Ġesù: Marija. Daret, u qaltlu: Rabboni; (jiġifieri, Mgħallem).
Ġesù qalilha: ‘La tmissnix għax għadni ma tlajtx għand Missieri: iżda mur għand ħuti, u għidilhom: Jien tiela’ għand Missieri, u Missierkom; Alla tiegħi, u Alla tagħkom.
Marija Maddalena ġiet u qalet lid-dixxpili li kienet rat lill-Mulej, u li qalilha dawn il-ħwejjeġ.
Imbagħad dak in-nhar stess fil-għaxija, li kien l-ewwel jum tal-ġimgħa, meta l-bibien ta’ fejn kienu d-dixxipli kienu magħluqin minħabba l-biża’ tal-Lhud, ġie Ġesù u qagħad fin-nofs, u qalilhom: Is-sliem għalikom.
Kif qal hekk, uriehom idejh u ġenbu. Id-dixxipli ferħu meta raw lill-Mulej.
Imbagħad Ġesù tenna jgħidilhom: Is-sliem għalikom! Kif il-Missier bagħat lili, hekk jiena nibgħat lilkom.
Kif qal hekk, nefaħ fuqhom u qalilhom: Ħudu l-Ispirtu Qaddis:
Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma.
Imma Tumas, wieħed mit-tnax, li jgħidulu Didimu, ma kienx magħhom meta ġie Ġesù.
Għalhekk qalulu d-dixxipli l-oħra: Rajna l-Mulej. Iżda dak qalilhom: Jekk ma narax f’idejh il-marka tal-imsiemer, u nqiegħed sebgħi fejn kienu l-imsiemer, u ndaħħal idi f’ġenbu, ma nemminx.
U wara tmint ijiem id-dixxipli tiegħu reġgħu kienu qegħdin ġewwa, u Tumas magħhom: imbagħad ġie Ġesù, waqt li l-bibien kienu magħluqin, u qagħad fin-nofs, u qal: Is-sliem għalikom.
Imbagħad qal lil Tumas: Ġib sebgħek hawn u ara jdejja; u ġib idek, u daħħalha f’ġenbi; u la tkunx bla fidi, iżda emmen.
U Tumas wieġeb u qallu: il-Mulej tiegħi, u ’l Alla tiegħi.
Qallu Ġesù: għax rajtni, emmint: imberkin dawk li ma rawx, u madankollu emmnu.
Hemm ħafna sinjali oħra li Ġesù għamel quddiem id-dixxipli tiegħu u li ma humiex imniżżla f’dan il-ktieb.
Iżda dawn inkitbu sabiex intom temmnu li Ġesù hu l-Messija Bin Alla, u biex bit-twemmin tagħkom ikollkom il-ħajja f’ismu.

Ġwanni 21

Wara dawn il-ħwejjeġ raġa’ Ġesù wera ruħu lid-dixxipli ħdejn il-baħar tat-Tiberja; u wera ruħu hekk.
Kienu flimkien Xmun Pietru, u Tumas, li jgħidulu Didimu, U Natanjel minn Kana tal-Galilija, u wlied Żebedew, u tnejn oħra mid-dixxipli tiegħu.
Qalilhom Xmun Pietru: Sejjer nistad. Qalulu: Niġu aħna wkoll miegħek. Ħarġu, u telgħu fuq dgħajsa minnufih; u dak il-lejl ma qabdu xejn.
Imma malli kien sebaħ, Ġesù kien wieqaf ix-xatt; iżda d-dixxipli ma kinux jafu li kien Ġesù.
Imbagħad qalilhom Ġesù: Uliedi, għandkom x’tieklu? Wiġbuh: Le.
U qalilhom: Itfgħu x-xibka n-naħa tal-lemin tad-dgħajsa, u ssibu. Tefgħu mela, u ma setgħux issa jiġbduha minħabba fil-kotra tal-ħut.
Għalhekk dak id-dixxiplu li Ġesù kien iħobb, qal lil Pietru: Hu l-Mulej. Issa meta Xmun Pietru sama’ li kien il-Mulej, libes il-libsa ta’ fuq, għax kien għoddu għarwien, u ntafa’ l-baħar.
U d-dixxipli l-oħra ġew f’dgħajsa żgħira; għax ma kinux bogħod mill-art, iżda qisu xi mitejn driegħ jiġbdu x-xibka bil-ħut.
Kif niżlu l-art, raw hemm nar tal-ġamar, u ħuta mqiegħda fuqu, u ħobż.
Qalilhom Ġesù: Ġibu mill-ħut li qbadtu issa.
Tala’ Xmun Pietru, u ġibed ix-xibka l-art mimlija b’mija u tlieta u ħamsin ħuta kbira: u għalkemm kien hemm ħafna, ix-xibka ma nqasmitx.
Qalilhom Ġesù: Ejjew u kulu. U ħadd mid-dixxipli ma kellu ħila jistaqsih: Min int? billi kienu jafu li kien il-Mulej.
Ġie mbagħad Ġesù, u ħa l-ħobż, u tahom, u hekk ukoll il-ħut.
Din kienet issa t-tielet darba li Ġesù wera lilu nnifsu lid-dixxipli tiegħu, wara li qam mill-imwiet.
Mela wara li kielu, Ġesù qal lil Xmun Pietru: Xmun, bin Ġwanni, tħobbni aktar minn dawn? Qallu: Iva, Mulej; int taf li nħobbok. Qallu: Irgħa l-ħrief tiegħi.
Raġa’ qallu t-tieni darba: Xmun, bin Ġwanni, tħobbni? Qallu: Iva, Mulej: int taf li nħobbok. Qallu: Irgħa n-nagħaġ tiegħi.
Raġa’ qallu għat-tielet darba: Xmun, bin Ġwanni, tħobbni? Għela Pietru għax għat-tielet darba qallu: Tħobbni? U qallu: Mulej, int taf kollox; int taf li jien inħobbok. Qallu Ġesù: Irgħa n-nagħaġ tiegħi.
Tassew, tassew ngħidlek: Meta kont żagħżugħ, kont titħażżem, u kont tmur fejn trid: imma meta tixjieħ, tiftaħ idejk, u ħaddieħor iħażżmek, u jieħdok fejn ma tridx.
U dan qalu, biex ifisser b’liema mewt kellu jigglorifika ’l Alla. U meta qal dan, qallu: Ejja warajja.
Imbagħad Pietru, meta dar, ra d-dixxiplu li kien iħobb Ġesù ġej wara; dak li waqt l-ikla tmejjel fuq sidru, u qal: Mulej min hu li se jittradik?
Malli Pietru rah qal lil Ġesù: Mulej, u dal-bniedem x’jagħmel?
Qallu Ġesù: Jekk irridu jibqa’ sa ma niġi, x’inhu dan għalik? Int imxi warajja.
Imbagħad ħarġet fost l-aħwa x-xniegħa, li dak id-dixxiplu ma jmutx: Imma Ġesù ma qallux: Ma jmutx; iżda: Jekk irridu jibqa’ sa ma narġa’ nigi, x’inhu dan għalik?
Dan hu d-dixxiplu li jixhed fuq dawn il-ħwejjeġ, u kitibhom: u nafu li x-xhieda tiegħu hi minnha.
U hemm ukoll ħafna ħwejjeġ oħra li għamel Ġesù, li, kieku kellhom jinkitbu waħda waħda, naħseb li lanqas id-dinja nfisha ma tista’ tasa’ l-kotba li jinkitbu. Amen.